റിയാദ്: സഊദി അറേബ്യയുടെ വിമാന കമ്പനിയായ സഊദിയ കേരളത്തിലേക്കുള്ള പുതിയ സര്‍വ്വീസിന് തുടക്കമായി. തിരുവനന്തപുരം വിമാനത്താവളത്തിലേക്കാണ് സഊദി എയര്‍ ലൈന്‍സിന്റെ പുതിയ സര്‍വ്വീസുകള്‍ ആരംഭിച്ചത്. തെക്കന്‍ ജില്ലക്കാര്‍ക്കും തിരുവനന്തപുരം ജില്ലയുടെ സമീപ പ്രദേശത്തെ കന്യാകുമാരി ഉള്‍പ്പെടെയുള്ള തമിഴ്‌നാട്ടില്‍ നിന്നുള്ള യാത്രക്കാര്‍ക്കും ആശ്വാസമാകുന്നതാണ് സഊദിയയുടെ നേരിട്ടുള്ള ഈ വിമാന സര്‍വ്വീസ്. കൂടാതെ, പ്രാവാസികള്‍ക്കൊപ്പം ഹജ്ജ് ഉംറ തീര്‍ഥാടകര്‍ക്കും നേരിട്ട് ജിദ്ദയിലെത്താന്‍ സഊദിയയുടെ പുതിയ സര്‍വ്വീസ് അനുഗ്രഹമാവും.

സഊദി തലസ്ഥാന നഗരിയായ റിയാദില്‍ നിന്നും ആഴ്ച്ചയില്‍ മൂന്ന് സര്‍വ്വീസുകളും ജിദ്ദയില്‍ നിന്നും രണ്ടു സര്‍വ്വീസുകളുമാണ് സഊദിയ തയ്യാറാക്കിയിരിക്കുന്നത്.

റിയാദില്‍ നിന്നുമാണ് തിരുവനന്തപുരത്തേക്കുള്ള ആദ്യ സര്‍വ്വീസ് ആരംഭിച്ചത്. ഞായറാഴ്ച പുലര്‍ച്ചെ 5:20 നു സഊദിയയുടെ എസ്.വി 756 വിമാനം റിയാദില്‍ നിന്നും യാത്ര തിരിച്ചു. ഉച്ചക്ക് 12:35ന് തിരുവനന്തപുരത്ത് എത്തിയ വിമാനം 2 മണിക്ക് തിരികെ റിയാദിലേക്ക് പറന്നു.

നേരത്തെ ഷെഡ്യൂള്‍ ചെയ്തിരുന്ന സമയത്തേക്കാള്‍ 25 മിനുട്ട് വൈകിയാണ് യാത്ര ആരംഭിച്ചത്. പ്രാദേശിക സമയം വൈകീട്ട് നാല് മണിക്കാണ് റിയാദില്‍ എത്തിച്ചേര്‍ന്നത്. റിയാദില്‍ നിന്നും ഞായര്‍ , ചൊവ്വ, വെള്ളി ദിവസങ്ങളിലാണ് തിരുവനന്തപുരം സര്‍വ്വീസ്. ജിദ്ദയില്‍ നിന്ന് വ്യാഴം , ശനി ദിവസങ്ങളിലാണ് സര്‍വീസ്. ഒക്ടോബര്‍ അഞ്ചിന് പുലര്‍ച്ചെ മൂന്നരക്കാണ് ജിദ്ദയില്‍ നിന്നുള്ള ആദ്യ സര്‍വ്വീസ്.

എയര്‍ ബസ് A330-300 ശ്രേണിയില്‍ പെട്ട പുതിയ വിമാനങ്ങളാണ് തിരുവനന്തപുരത്തേക്ക് സര്‍വ്വീസ് നടത്തുക. 36 ബിസിനസ് ക്ലാസ് ഉള്‍പ്പെടെ 298 സീറ്റുകളാണ് വിമാനത്തിലുണ്ടാവുക. ജിദ്ദയില്‍ നിന്ന് നിലവില്‍ തിരുവനന്തപുരത്തേക്ക് നേരിട്ട് സര്‍വ്വീസ് ഇല്ലാത്തതിനാല്‍ ദക്ഷിണ കേരളത്തില്‍ നിന്നുള്ള യാത്രക്കാര്‍ ഏറെ പ്രായസപ്പെട്ടിരുന്നു. ഇതോടെ ഇന്ത്യയിലേക്ക് നടത്തുന്ന സഊദിയയുടെ സര്‍വ്വീസുകളുടെ എണ്ണം എട്ടായി.

തിരുവനന്തപുരത്തിന് പുറമെ കൊച്ചി, ഹൈദരാബാദ്, ഡല്‍ഹി, ബംഗ്‌ളൂരു, ലക്‌നോ, മുബൈ, ചെന്നൈ എന്നിവിടങ്ങളിലേക്കാണ് സഊദിയ വിമാന സര്‍വ്വീസുകള്‍ നടത്തുന്നത്.