ചെന്നൈ: രാഷ്ട്രീയത്തില്‍ വിജയിക്കണമെങ്കില്‍ പണവും പ്രശസ്തിയും മാത്രം പോരെന്ന് തമിഴ് സൂപ്പര്‍ താരം രജനികാന്ത്. ജനങ്ങള്‍ക്ക് താല്‍പര്യമുണ്ടാകുന്നുണ്ടെങ്കില്‍ മാത്രമേ ഒരാള്‍ക്ക് രാഷ്ട്രീയത്തില്‍ വിജയിക്കാനാകൂ എന്നും അദ്ദേഹം അഭിപ്രായപ്പെട്ടു.
ചെന്നൈയില്‍ നടന്‍ ശിവാജി ഗണേശന്റെ സ്മാരകത്തിന്റെ ഉദ്ഘാടന ചടങ്ങില്‍ പങ്കെടുത്ത് സംസാരിക്കുകയായിരുന്നു അദ്ദേഹം. നടന്‍ കമല്‍ ഹാസനും ചടങ്ങിനെത്തിയിരുന്നു. രജനിയുടെയും കമലിന്റെയും രാഷ്ട്രീയ പ്രവേശനത്തെക്കുറിച്ച് അഭ്യൂഹങ്ങളുയരുന്നതിനിടയിലാണ് ഇരുവരും ഒരേ വേദിയില്‍ എത്തിയത്.
ഒരു നടനെ രാഷ്ട്രീയക്കാരനാക്കി പരിവര്‍ത്തിപ്പിക്കുന്ന ഘടകം ജനസ്വാധീനമാണ്. ഒരു പക്ഷെ കമല്‍ ഹാസന് അത് അറിയാമായിരിക്കും. രണ്ടുമാസം മുന്‍പ് ചോദിച്ചിരുന്നുവെങ്കില്‍ അദ്ദേഹമത് ഞാനുമായി പങ്കുവെച്ചേനെ. ഇപ്പോള്‍ അതേ ചോദ്യം ഉയര്‍ത്തുമ്പോള്‍, കൂടെ വരൂ, പറഞ്ഞുതരാം എന്നാണ് കമലിന്റെ മറുപടിയെന്നും രജനീകാന്ത് തമാശ രൂപേണ പറഞ്ഞു.
ശിവാജിയുടെ സ്മാരകം ഉദ്ഘാടനം ചെയ്യുന്നതില്‍ കാലതാമസം വരുത്തിയ അണ്ണാ ഡി.എം.കെ സര്‍ക്കാരിനെ വിമര്‍ശിച്ചുകൊണ്ടാണ് കമല്‍ ഹാസന്‍ സംസാരിച്ചത്. രാഷ്ട്രീയത്തിനപ്പുറത്തേക്ക് വ്യക്തിപ്രഭാവവും പ്രശസ്തിയും വ്യാപിപ്പിച്ച വ്യക്തിയായിരുന്നു ശിവാജി ഗണേശനെന്ന് അദ്ദേഹം ചൂണ്ടിക്കാട്ടി.
തമിഴ്‌നാട് ഉപമുഖ്യമന്ത്രി ഒ. പനീര്‍ശെല്‍വം സ്മാരകത്തിന്റെ ഉദ്ഘാടനം നിര്‍വഹിച്ചു. നേരത്തെ മുഖ്യമന്ത്രിയും ഉപമുഖ്യമന്ത്രിയും ചടങ്ങില്‍ പങ്കെടുക്കില്ലെന്ന് അറിയിപ്പുണ്ടായതിനെതുടര്‍ന്ന് പ്രതിഷേധവുമായി ശിവാജിയുടെ മകനും നടനുമായ പ്രഭു രംഗത്തെത്തിയിരുന്നു. ഇതോടെ പ്രതിഷേധം ശക്തമായ സാഹചര്യത്തിലാണ് ഉപമുഖ്യമന്ത്രി പനീര്‍ ശെല്‍വം പരിപാടിയില്‍ സംബന്ധിച്ചത്.