പഞ്ച്കുള: അറസ്റ്റിലായ ദേരാ സച്ഛാ സൗദാ തലവന്‍ ഗുര്‍മീതിന്റെ വളര്‍ത്തുമകള്‍ ഹണിപ്രീത് സിങ് അറസ്റ്റില്‍. ചണ്ഡീഗഢിനു സമീപം ദേശീയപാതയില്‍ വെച്ചാണ് ഹരിയാന പൊലിസ് ഹണിപ്രീതിനെ അറസ്റ്റ് ചെയ്തത്.

ഗുര്‍മീതുമായുള്ള ബന്ധത്തെ കുറിച്ച ആരോപണങ്ങള്‍ നിഷേധിച്ചുകൊണ്ട് ഹണിപ്രീത് സിങ് ഇന്ന് രാവിലെ മുതല്‍ മാധ്യമങ്ങളില്‍ സജീവമായിരുന്നു.

ഗുര്‍മീതിന്റെ ആശ്രമത്തില്‍ പെണ്‍കുട്ടികളെ ഉപദ്രവിക്കാറുണ്ടെന്ന വാര്‍ത്തയും ഹണിപ്രീത് നിഷേധിച്ചു.

താന്‍ ഒരിക്കലും രാജ്യം വിട്ടു പോവില്ലെന്നും നിയമപരമായ ഉപദേശം ലഭിച്ച ശേഷം കീഴടങ്ങുമെന്നും അവര്‍ അറിയിച്ചു. ഇതിന് പിന്നാലെയാണ് ഹരിയാന പൊലിസിന്റെ അറസ്റ്റ്.

ഗുര്‍മീതിനെ ബലാത്സംഗ കേസില്‍ ശിക്ഷിച്ചതിനെ തുടര്‍ന്നുണ്ടായ കലാപങ്ങളുടെ മുഖ്യ സൂത്രധാരയെന്ന് സംശയിക്കുന്ന വ്യക്തിയാണ് ഹണിപ്രീത്. പൊലിസ് അന്വേഷണം തനിക്കുനേരെയാണെന്ന് മനസിലാക്കിയ ഹണിപ്രീത് ഒരു മാസത്തിലേറെയായി ഒളിവിലായിരുന്നു.