ബഗ്ദാദ്: ഇറാഖ് മുന്‍ പ്രസിഡന്റ് ജലാല്‍ തലബാനി അന്തരിച്ചു. 84 വയസായിരുന്നു. ഇന്നലെ ജര്‍മനിയിലാണ് അന്ത്യം.
ഇറാഖിന്റെ ആദ്യ അറബ് ഇതര പ്രസിഡന്റായ തലബാനി കുര്‍ദിസ്താന്‍ രാഷ്ട്രീയ പാര്‍ട്ടിയായ പാട്രിയോടിക് യൂനിയന്‍ ഓഫ് കുര്‍ദിസ്താന്റെ(പി.യു.കെ) മുതിര്‍ന്ന നേതാവുമായിരുന്നു. 2005ല്‍ സദ്ദാമിനു ശേഷം നടന്ന ആദ്യ തെരഞ്ഞെടുപ്പില്‍ പ്രസിഡന്റായി തെരഞ്ഞെടുക്കപ്പെട്ട അദ്ദേഹം 2014 വരെ ഭരണത്തിലിരുന്നു.
കുര്‍ദിസ്താനെ ഇറാഖില്‍നിന്നു സ്വതന്ത്രമാക്കാനുള്ള രാഷ്ട്രീയ സമരങ്ങളുടെ മുന്‍നിരയിലുണ്ടായിരുന്നു. അതേസമയം, കുര്‍ദുകളടക്കം രാജ്യത്തെ വിഘടിച്ചുനില്‍ക്കുന്ന ജനങ്ങള്‍ക്കും ഭരണകൂടത്തിനുമിടയിലുള്ള മധ്യസ്ഥനായും ദീര്‍ഘകാലം പ്രവര്‍ത്തിച്ചു. 1933ല്‍ ഇറാഖിലെ കല്‍കാനില്‍ ജനിച്ച തലബാനി ബഗ്ദാദ് സര്‍വകലാശാലയില്‍നിന്ന് നിയമത്തില്‍ ബിരുദം നേടിയിട്ടുണ്ട്.