അഹമ്മദാബാദ്: 2002ലെ ഗുജറാത്ത് വംശഹത്യ നടക്കുമ്പോള്‍ ഗുജറാത്ത് മുഖ്യമന്ത്രിയായിരുന്ന മോദിയുള്‍പ്പടെയുള്ള ഉന്നതരായ പ്രതികളെ കുറ്റവിമുക്തരാക്കിയ പ്രത്യേക അന്വേഷണ സംഘത്തിന്റെ (എസ്.ഐ.ടി) നടപടിയെ ചോദ്യം ചെയ്ത് സാക്കിയാ ജാഫ്രി നല്‍കിയ ഹരജി ഗുജറാത്ത് ഹൈക്കോടതി തള്ളി.

വംശഹത്യക്കിടെ ക്രൂരമായി കൊല്ലപ്പെട്ട കോണ്‍ഗ്രസ് മുന്‍ എം.പി.ഇഹ്‌സാന്‍ ജാഫ്രിയുടെ വിധവയാണ് സാക്കിയ. 2014 മാര്‍ച്ചിലാണ് സാക്കിയ ജാഫ്രി ഹൈക്കോടതിയെ സമീപിച്ചത്.

കൊലപാതകം, കലാപം, ബലാല്‍സംഗം എന്നിവയിലേക്കു നയിച്ച കുറ്റകരമായ ഗൂഢാലോചനയും തെളിവുനശിപ്പിക്കലുമാണ് മോദിയുള്‍പ്പെടെ ഉന്നത പൊലിസ് ഉദ്യോഗസ്ഥര്‍, ഐ.എ.എസ് ഉദ്യോഗസ്ഥര്‍ എന്നിവരടങ്ങുന്ന 58 പ്രതികള്‍ക്കെതിരായ ആരോപണം.

സാക്കിയാ ജാഫ്രി സുപ്രിം കോടതിയെ സമീപിച്ചതിനെ തുടര്‍ന്നാണ് വംശഹത്യയില്‍ മോദിയുള്‍പ്പെടെയുള്ളവരുടെ പങ്ക് അന്വേഷിക്കാന്‍ സുപ്രിംകോടതി സി.ബി.ഐ ഡയറക്ടര്‍ ആയിരുന്ന ആര്‍.കെ.രാഘവന്റെ നേതൃത്വത്തില്‍ എസ്.ഐ.ടിയെ നിയോഗിച്ചത്.

എന്നാല്‍ സംഭവം അന്വേഷിച്ച എസ്.ഐ.ടി കീഴ്‌ക്കോടതിയില്‍ കേസ് അവസാനിപ്പിച്ചതായി 2012 ഫെബ്രുവരിയില്‍ റിപ്പോര്‍ട്ട് നല്‍കുകയായിരുന്നു. എസ്.ഐ.ടിയുടെ ഈ നടപടി ചോദ്യംചെയ്താണ് സാക്കിയാ ഹൈക്കോടതിയെ സമീപിച്ചത്.