കടുത്തുരുത്തി: 88 കാരിയായ വയോധിക ബാങ്കില്‍ നിക്ഷേപിച്ചിരുന്ന 1,36,000 രൂപ എ.ടിഎം കാര്‍ഡ് ഉപയോഗിച്ചു തട്ടിയെടുത്ത കൊച്ചുമക്കള്‍ പിടിയില്‍. കാട്ടാമ്പാക്ക് പ്രസാദമന്ദിരത്തില്‍ സരോജിനി കുഞ്ഞുക്കുട്ടി(88)യുടെ പണമാണ് നഷ്ടപ്പെട്ടത്. സരോജിനിയമ്മയുടെ മകന്റെ മക്കളായ ദിവ്യ മോള്‍(36), ബിന്ദു മോള്‍(44) എന്നിവരാണ് പണം തട്ടിയെടുത്തതെന്ന് പൊലിസ് പറഞ്ഞു.
സംഭവത്തെപ്പറ്റി പൊലിസ് പറയുന്നത്: ഭര്‍ത്താവ് മരിച്ചതിനെ തുടര്‍ന്ന് സരോജിനിയമ്മ തനിച്ചായിരുന്നു താമസം. ഉണ്ടായിരുന്ന സ്ഥലം മക്കള്‍ക്ക് വീതം വച്ചു നല്‍കിയ ശേഷം സ്വന്തമായുള്ള നാല് സെന്റ് സ്ഥലത്തായിരുന്നു ഇവര്‍ താമസിച്ചിരുന്നത്. മകന്റെ വിവാഹമോചിതരായ പെണ്‍മക്കള്‍ വീട് വയ്ക്കുന്നതിനായി സ്ഥലം ആവശ്യപ്പെട്ടു. തുടര്‍ന്ന് വയോധിക തന്റെ പേരിലുണ്ടായിരുന്ന മൂന്ന്‌സെന്റ് സ്ഥലം ഒന്നര ലക്ഷം രൂപയ്ക്ക് അവര്‍ക്ക് നല്‍കിയിരുന്നു. ഇവര്‍ വയോധികയുടെ പേരില്‍ പണം ബാങ്കില്‍ നിക്ഷേപിച്ചു.
പീന്നിട് തപാലിലൂടെയെത്തിയ എ.ടി.എം കാര്‍ഡ് യുവതികള്‍ പോസ്റ്റ്മാന്റെ പക്കല്‍ നിന്ന് ഒപ്പിട്ട് വാങ്ങി പണം പലപ്പോഴായി പിന്‍വലിക്കുകയായിരുന്നു. സരോജിനിയമ്മ മരുന്ന് വാങ്ങുന്നതിനായി പണമെടുക്കാന്‍ ബാങ്കിലെത്തിയപ്പോളാണ് അക്കൗണ്ടിലുണ്ടായിരുന്ന ഒന്നര ലക്ഷം രൂപയും പെന്‍ഷന്‍ ലഭിച്ച പണവുമടക്കം നഷ്ടപ്പെട്ടതായി അറിയുന്നത്.
തുടര്‍ന്ന് കൊച്ചുമക്കളായ യുവതികള്‍ തന്റെ എ.ടി.എം കാര്‍ഡുപയോഗിച്ചു പണം തട്ടിയെടുത്തതെന്ന് മനസിലാക്കുകയും പൊലിസില്‍ പരാതി നല്‍കുകയും ചെയ്തു.
ഇതേത്തുടര്‍ന്ന് നടത്തിയ അന്വേഷണത്തിലാണ് യുവതികളെ അറസ്റ്റ് ചെയ്തതെന്ന് കടുത്തുരുത്തി എസ്.ഐ കെ.കെ. ഷംസു പറഞ്ഞു. പ്രതികളെ വൈക്കം കോടതിയില്‍ ഹാജരാക്കി.