ന്യൂഡല്‍ഹി: ലോകകപ്പിലെ ആദ്യ വിജയം മുന്‍ ചാംപ്യന്‍മാരായ ഘാനയ്ക്ക്. ലാറ്റിനമേരിക്കന്‍ കരുത്തരായ കൊളംബിയക്കെതിരേ മറുപടിയില്ലാത്ത ഒറ്റ ഗോളിനാണ് ഘാന വിജയിച്ചത്.
കളിയുടെ 39ാം മിനുട്ടില്‍ സാദിഖ് ഇബ്‌റാഹിമാണ് ഘാനയ്ക്കായി വല ചലിപ്പിച്ചത്. ആദ്യ പകുതിയില്‍ ഇരു പക്ഷവും നിരവധി അവസരങ്ങള്‍ തുറന്നെടുത്തെങ്കിലും ഗോള്‍ പിറന്നില്ല.
കൗണ്ടര്‍ അറ്റാക്കിലൂടെ ഘാന നായകന്‍ എറിക്ക് അയ മെനഞ്ഞെടുത്ത കളിയാണ് സാദിഖിന്റെ ഗോളില്‍ കലാശിച്ചത്. സമനില ഗോളിനായി കൊളംബിയ ഇരമ്പിയെങ്കിലും അതൊന്നും ഫലം കണ്ടില്ല. അടുത്ത മത്സരത്തില്‍ കൊളംബിയ ആതിഥേയരായ ഇന്ത്യയുമായും ഘാന- അമേരിക്കയേയും നേരിടും.

ഒപ്പത്തിനൊപ്പം ന്യൂസിലന്‍ഡ്- തുര്‍ക്കി

മുംബൈ: മഴയില്‍ കുതിര്‍ന്ന പോരാട്ടത്തില്‍ ന്യൂസിലന്‍ഡും തുര്‍ക്കിയും 1-1ന് സമനിലയില്‍ പിരിഞ്ഞു. സംഭവബഹുലമായ അദ്യ പോരാട്ടത്തില്‍ ഈ ലോകകപ്പിലെ ആദ്യ ഗോള്‍ നേടി തുര്‍ക്കി മുന്നില്‍ കടന്നു.
19ാം മിനുട്ടില്‍ അഹമദ് കുടുക്കു ഇന്ത്യ നടാടെ ആതിഥേയരായ ലോകകപ്പിലെ ആദ്യ ഗോളിന് അവകാശിയായി. രണ്ടാം പകുതിയില്‍ കിവികള്‍ ഗോള്‍ മടക്കി. അവരുടെ നായകന്‍ കൂടിയായ മാക്‌സ് മാറ്റയാണ് ടീമിന് സമനില ഗോള്‍ സമ്മാനിച്ചത്. 58ാം മിനുട്ടിലാണ് ന്യൂസിലന്‍ഡ് സ്‌കോര്‍ ഒപ്പമെത്തിച്ചത്.
കളിയില്‍ രണ്ടാം മഞ്ഞ കാര്‍ഡ് കണ്ട് ന്യൂസിലന്‍ഡിന്റെ ഹീറോ കൂടിയായ നായകന്‍ മാറ്റയ്ക്ക് ചുവപ്പ് കാര്‍ഡ് വാങ്ങി പുറത്ത് പോകേണ്ടി വന്നത് അവര്‍ക്ക് ക്ഷീണമായി. ഗ്രൂപ്പിലെ അടുത്ത മത്സരത്തില്‍ ന്യൂസിലന്‍ഡ്- പരാഗ്വെയുമായും തുര്‍ക്കി- മാലിയുമായും ഏറ്റുമുട്ടും.