കാക്കനാട്: ലോകത്തിലെ പലരാജ്യങ്ങളിലെയും കാടുകളിലേക്ക് കാമറയുമായി കയറി അതിസുന്ദര ചിത്രങ്ങള്‍ പകര്‍ത്തിയ ഷെഫീഖ് ബഷീര്‍ അഹമ്മദിനെ ഇത്തവണ തേടിയെത്തിയത് സംസ്ഥാന സര്‍ക്കാരിന്റെ വൈല്‍ഡ് ഫോട്ടോഗ്രഫി അവാര്‍ഡ്. പത്തനംതിട്ടക്കാരനും എണാകുളം ആര്‍.ടി.ഒ ഓഫിസില്‍ വെഹിക്കിള്‍ ഇന്‍സ്‌പെക്ടറുമായ ഈ സാഹസിക ഫോട്ടോഗ്രഫര്‍ ഹരിത വനഭംഗി പകര്‍ത്താന്‍ കയറി ചെല്ലാത്ത കാടുകളില്ല.
2016ല്‍ പറമ്പിക്കുളത്തെ ടൈഗര്‍ റിസര്‍വ് വനത്തില്‍ കണ്ട കടുവയുടെ ചിത്രമാണ് ഇത്തവണ അവാര്‍ഡിന് നിമിത്തമായത്. രണ്ട് മണിക്കൂറിലേറെ വെള്ളത്തില്‍ ചെലവഴിച്ച് ഇലച്ചാര്‍ത്തുകള്‍ക്കിടയിലൂടെ എത്തുന്ന സൂര്യവെളിച്ചത്തില്‍ തിരിഞ്ഞും മറിഞ്ഞും കിടന്ന് ഉല്ലസിക്കുന്ന കടുവയുടെ ചിത്രമാണ് ഷെഫീഖ് പകര്‍ത്തിയത്. ചിത്രമെടുക്കുന്നതിനിടെ തന്നേ കണ്ട കടുവ ആക്രമണത്തിന് മുതിരാതെ ഉള്‍വനത്തിലേക്ക് പാഞ്ഞതു തന്റെ ജീവന്‍ തിരിച്ചു കിട്ടിയെന്നും അദ്ദേഹം പറഞ്ഞു.
വന്യ ജീവികളുടെ ദൃശ്യങ്ങള്‍ ഒപ്പിയെടുക്കാന്‍ ദിവസങ്ങളോളം കാടിനകത്ത് കഴിയാനും ഷെഫീഖിലെ ഛായാഗ്രാഹകന്‍ ഒരുക്കം. കാമറയും തോളില്‍ തൂക്കി സൈലന്റ് വാലിയിലെ ഉള്‍ക്കാടുകളില്‍ പോലും മിഴിവാര്‍ന്ന ഒരു ദൃശ്യത്തിനായി ദിനരാത്രങ്ങള്‍ പലതും തനിച്ച് താണ്ടിയിട്ടുണ്ടെന്ന് ഷെഫീഖ് ബഷീര്‍ അഹമ്മദ് പറയുന്നു.

[caption id="attachment_435909" align="alignnone" width="218"] ഷെഫീഖ് ബഷീര്‍ അഹമ്മദ്[/caption]

ചാരക്കരടികളുടെ മീന്‍ കൊയ്ത്ത് കാണാന്‍ ലോകത്തിന്റെ പലഭാഗങ്ങളില്‍ നിന്നും പ്രകൃതി സ്‌നേഹികളും വന്യജീവി ഫോട്ടോഗ്രാഫര്‍മാരും എത്തുന്ന റഷ്യയിലെ കംചത്ക ഉള്‍പ്പെടെ കെനിയ, താന്‍സാനിയ, തായ്‌ലന്റ്, ഇന്‍ഡോനേഷ്യ, അന്റാര്‍ട്ടിക്ക തുടങ്ങിയ രാജ്യങ്ങളിലെല്ലാം വനഭംഗിയും കാട്ടുമൃഗങ്ങളുടെ വന്യതയും കാമറക്കണ്ണുകളില്‍ പകര്‍ത്തുവാന്‍ ഷെഫീഖ് ബഷീര്‍ അഹമ്മദ് അലഞ്ഞു.
1999 ല്‍ മോട്ടോര്‍ വാഹന വകുപ്പില്‍ ഉദ്യോഗം ലഭിച്ചതോടെ കേരളത്തിലെ കാടുകളിലേക്കായി യാത്രകള്‍. 2014, 2015 വര്‍ഷങ്ങളില്‍ സംസ്ഥാന സര്‍ക്കാരിന്റെ പുരസ്‌കാരവും ഇദ്ദേഹത്തെ തേടിയെത്തി. പത്തനംതിട്ടയില്‍ വനാതിര്‍ത്തിയോട് ചേര്‍ന്ന ഗ്രാമത്തിലായിരുന്നു ബാല്യകാലം. 14 വര്‍ഷമായി എറണാകുളത്ത് സ്ഥിരതാമസമാണെങ്കിലും അവസരം ഒത്തുവന്നാല്‍ ഷെഫീഖ് ബഷീര്‍ അഹമ്മദ് ഇപ്പോഴും കാട് കയറും. ഭാര്യ സജീന. മകന്‍ നിഷാല്‍ മുഹമ്മദ് രാജഗിരിയില്‍ എട്ടാം ക്ലാസ് വിദ്യാര്‍ഥിയും.