ന്യൂഡല്‍ഹി: ഗ്രൂപ്പ് എയിലെ ആദ്യ മത്സരത്തില്‍ അമേരിക്ക മറുപടിയില്ലാത്ത ഒറ്റ ഗോളിന് ഘാനയെ വീഴ്ത്തി പ്രീ ക്വാര്‍ട്ടര്‍ സാധ്യതകള്‍ സജീവമാക്കി. ഗ്രൂപ്പ് ബിയിലെ ആദ്യ പോരാട്ടത്തില്‍ മാലി തുര്‍ക്കിയെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തി.

അമേരിക്ക- ഘാന
ഏതാണ്ട് തുല്ല്യ നിലയിലാണ് അമേരിക്ക- ഘാന മത്സരം മുന്നേറിയത്. കളിയുടെ ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 75ാം മിനുട്ടില്‍ അയോ അകിനോല നേടിയ ഏക ഗോളിലാണ് യു.എസ്.എ തുടര്‍ച്ചയായ രണ്ടാം വിജയം പിടിച്ചത്. പന്തടക്കത്തില്‍ അമേരിക്ക നേരിയ ലീഡ് സ്വന്തമാക്കി. 54 ശതമാനമായിരുന്നു അവര്‍ പന്ത് കൈവശം വച്ചത്. ഘാന 46 ശതമാനവും. നിരവധി ഗോളവസരങ്ങളാണ് ഘാന തുറന്നെടുത്തത്. ഇതില്‍ രണ്ട് ഗോളവസരങ്ങള്‍ തളികയിലെന്ന വണ്ണം അവര്‍ക്ക് ലഭിക്കുകയും ചെയ്തു. പക്ഷേ അതെല്ലാം അവരുടെ ഭാവനാശൂന്യമായ സമീപനത്താല്‍ വിഫലമായി. അമേരിക്കയാകട്ടെ 11 അവസരങ്ങള്‍ സൃഷ്ടിച്ചു. ഗോള്‍ ലക്ഷ്യമിട്ട് രണ്ട് ഷോട്ടുകള്‍ ഉതിര്‍ത്തതില്‍ ഒന്ന് അവര്‍ ലക്ഷ്യത്തിലുമെത്തിച്ചു. ഇരു പക്ഷവും പരുക്കന്‍ അടവുകള്‍ പുറത്തെടുക്കുന്നതിലും മത്സരിച്ചു. ഒടുവില്‍ 75ാം മിനുട്ടില്‍ അയോ അകിനോല ബോക്‌സിന്റെ വലത് മൂലയില്‍ നിന്ന് തൊടുത്ത ഷോട്ടാണ് വലയില്‍ കയറി അമേരിക്കയ്ക്ക് വിജയമൊരുക്കിയത്. ജയത്തോടെ ആറ് പോയിന്റുമായി യു.എസ്.എ ഗ്രൂപ്പില്‍ ഒന്നാം സ്ഥാനത്ത്. നേരത്തെ ആദ്യ മത്സരത്തില്‍ ഘാന കൊളംബിയയെ കീഴടക്കിയിരുന്നു.

മാലി- തുര്‍ക്കി
ആദ്യ മത്സരത്തിലെ തോല്‍വി മറന്ന് ആഫ്രിക്കന്‍ കരുത്തരായ മാലിയുടെ ശക്തമായ തിരിച്ചുവരവ് കണ്ട പോരാട്ടത്തില്‍ അവര്‍ മറുപടിയില്ലാത്ത മൂന്ന് ഗോളുകള്‍ക്ക് തുര്‍ക്കിയെ പരാജയപ്പെടുത്തി. ജെമൗസ ട്രവോറ, ലസ്സന എന്‍ഡ്യായെ, ഫോഡെ കൊനാടെ എന്നിവരാണ് മാലിക്കായി സ്‌കോര്‍ ചെയ്തത്. പന്ത് കൈവശം വച്ച് കളിക്കുന്നതില്‍ തുര്‍ക്കി വിജയിച്ചെങ്കിലും അവര്‍ ഗോളടിക്കാന്‍ മറന്നു. എന്നാല്‍ തുടക്കം മുതല്‍ ഒടുക്കം വരെ വന്‍ ആക്രമണം അഴിച്ചുവിട്ട മാലി തുര്‍ക്കി പ്രതിരോധത്തിന് തലവേദന സൃഷ്ടിക്കുന്നതില്‍ വിജയിച്ചു. 29 തവണയാണ് അവര്‍ തുര്‍ക്കി ഗോള്‍ പോസ്റ്റ് ലക്ഷ്യമിട്ട് നിറയൊഴിച്ചത്.
കളി തുടങ്ങി 38ാം മിനുട്ടില്‍ തന്നെ മാലി ആദ്യ ഗോള്‍ നേടി. ജെമൗസയാണ് ആഫ്രിക്കന്‍ കരുത്തര്‍ക്ക് ലീഡൊരുക്കിയത്. പിന്നീട് രണ്ട് ഗോളുകള്‍ രണ്ടാം പകുതിയിലാണ് മാലി ലക്ഷ്യത്തിലെത്തിച്ചത്. എന്‍ഡ്യായെ 68ാം മിനുട്ടിലും കൊനാടെ 86ാം മിനുട്ടിലും വല കുലുക്കി. മത്സരത്തില്‍ കടുത്ത ടാക്ലിങുകളുമായി മാലി താരങ്ങള്‍ തുര്‍ക്കി താരങ്ങളെ നേരിട്ടപ്പോള്‍ 19 ഫൗളുകളാണ് അവര്‍ക്ക് നേരിടേണ്ടി വന്നത്. മത്സരത്തില്‍ ഇരു ടീമുകളും ഏതാണ്ട് തുല്ല്യ നിലയില്‍ തന്നെയാണ് പൊരുതിയതെങ്കിലും തുര്‍ക്കി താരങ്ങള്‍ ഗോളടിക്കാന്‍ മറന്നത് അവര്‍ക്ക് തിരിച്ചടിയായി. ആദ്യ മത്സരത്തില്‍ മാലി 3-2ന് പരാഗ്വെയോട് പരാജയപ്പെട്ടിരുന്നു. തുര്‍ക്കി ആദ്യ മത്സരത്തില്‍ ന്യൂസിലന്‍ഡുമായി 1-1ന് സമനിലയില്‍ പിരിയുകയായിരുന്നു.