യാങ്കോണ്‍: റോഹിംഗ്യകള്‍ മ്യാന്‍മര്‍ പൗരന്മാരല്ലെന്ന് സൈനിക മേധാവി ജനറല്‍ മിന്‍ ആങ് ഹ്ലൈങ്. മ്യാന്‍മറില്‍ നിന്നുള്ള റോഹിംഗ്യന്‍ പലായനവുമായി ബന്ധപ്പെട്ട് യു.എസ് അംബാസഡര്‍ സ്‌കോട്ട് മാര്‍സയിലുമായി നടത്തിയ ചര്‍ച്ചയിലാണ് അദ്ദേഹം ഇക്കാര്യം പറഞ്ഞത്. സംഭാഷണത്തിന്റെ വിവരങ്ങള്‍ സ്‌കോട്ട് മാര്‍സല്‍ ഫേസ്ബുക്കിലൂടെ പങ്കുവച്ചു. ചര്‍ച്ചയില്‍ റോഹിംഗ്യകളെ പരാമര്‍ശിക്കാന്‍ ബംഗാളികള്‍ എന്ന പദമാണ് സൈനിക മേധാവി ഉപയോഗിച്ചത്. റോഹിംഗ്യകള്‍ കുടിയേറ്റക്കാരാണെന്ന് വ്യക്തമാക്കാനാണ് ഈ പദം ഉപയോഗിച്ചത്.
ബ്രിട്ടീഷ് കോളനിയാണ് റോഹിംഗ്യകളെ മ്യാന്‍മറിലേക്ക് കൊണ്ടുവന്നതെന്നും അദ്ദേഹം പറഞ്ഞു. ബംഗാളികളെ മ്യാന്‍മറുകാരായി പരിഗണിക്കാനാവില്ല.
അവര്‍ കോളനിയുടെ ഭാഗമാണ്. റോഹിംഗ്യകളെന്ന് ഇവരെ വിളിക്കാനാവില്ലെന്നതിന് വ്യക്തമായ തെളിവുകളുണ്ട്. മ്യാന്‍മറിലുള്ള ബംഗാളികള്‍ യഥാര്‍ഥ ബംഗാളികളാണ്. ഭാഷ, സംസ്‌കാരം, വംശം എന്നീ സാമ്യതകളുള്ള പ്രദേശങ്ങളിലേക്ക് അവര്‍ പലായനം ചെയ്‌തേക്കാം.
അവര്‍ക്ക് ആ പ്രദേശങ്ങള്‍ കൂടുതല്‍ സുരക്ഷിതമായതിനാലാവാം ഇത്തരത്തിലുള്ള പ്രവര്‍ത്തികള്‍. ബംഗ്ലാദേശിലേക്ക് പലായനം ചെയ്തവരുടെ കണക്കുകള്‍ പെരുപ്പിച്ച് കാണിക്കുകയാണെന്നും അദ്ദേഹം പറഞ്ഞു.
സൈനിക മേധാവിയുടെ പ്രതികരണം റോഹിംഗ്യന്‍ വിഷയത്തില്‍ വിട്ടുവീഴ്ചയില്ലെന്ന സൂചനയാണ് നല്‍കുന്നത്.
റോഹിംഗ്യകള്‍ക്കെതിരായ ബുദ്ധ തീവ്രവാദികളുടെയും മ്യാന്‍മര്‍ സൈന്യത്തിന്റെയും ആക്രമണത്തില്‍ ഇതുവരെ 5,00,000 പേര്‍ ബംഗ്ലാദേശിലേക്ക് പലായനം ചെയ്തിട്ടുണ്ട്.