ന്യൂഡല്‍ഹി: മകന്‍ ജെയ് ഷാക്കെതിരായ അഴിമതി ആരോപണങ്ങള്‍ നിഷേധിച്ച് ബി.ജെ.പി ദേശീയ അധ്യക്ഷന്‍ അമിത് ഷാ. 'ജെയ് ഷായുടെ ബിസിനസ് വ്യവഹാരങ്ങളെ കുറിച്ച ഒരു ചോദ്യമേ ഉദിക്കുന്നില്ല. കയറ്റുമതി വ്യവസായമായിരുന്നു. അതിന് ചെലവ് കൂടുതലും വരവ് കുറവുമായിരുന്നു'- അമിത് ഷാ പറഞ്ഞു. ഒരു കമ്പനിയുടെ വില്‍പന ഒരു കോടി കവിഞ്ഞെന്നാല്‍ അതിന്റെ ലാഭം ഒരു കോടിയെന്ന് അര്‍ഥമില്ല- അദ്ദേഹം ചൂണ്ടിക്കാട്ടി.

'മകന്റെ കമ്പനിക്ക് വഴി വിട്ട ഒരു സഹായവും കിട്ടിയിട്ടില്ല. 80 കോടി വരുമാനമുണ്ടായിരുന്നപ്പോഴും കമ്പനി 1.5 കോടി നഷ്ടത്തിലായിരുന്നു. അവന് ലാഭമുണ്ടായിട്ടില്ല. എല്ലാ ഇടപാടുകളും ചെക്ക് വഴിയാണ് നടത്തിയിട്ടുള്ളത്. അതിനാല്‍ കള്ളപ്പണം വെളുപ്പിച്ചെന്ന ആരോപണത്തിന് സ്ഥാനമില്ലെന്നും അദ്ദേഹം കൂട്ടിച്ചേര്‍ത്തു.