കൊച്ചി: കലാലയ രാഷ്ട്രീയപ്രവര്‍ത്തനത്തെ സമരമാര്‍ഗമായി മാത്രം നിരീക്ഷിച്ച കോടതി നടപടി ദൗര്‍ഭാഗ്യകരമെന്ന് കെ.എസ്.യു സംസ്ഥാന ജനറല്‍ സെക്രട്ടറി എ.എ അജ്മല്‍. ധര്‍ണയും സത്യഗ്രഹവുംപോലുള്ള സമരമാര്‍ഗങ്ങളിലൂടെ സ്വാതന്ത്ര്യംലഭിച്ച രാജ്യത്ത് അത്തരം സമരമാര്‍ഗങ്ങള്‍ക്ക് സ്ഥാനമില്ലെന്നുപറഞ്ഞ കോടതിയുടെ പരാമര്‍ശം അപഹാസ്യമാണ്.
സമരമാര്‍ഗങ്ങള്‍ സമ്മര്‍ദതന്ത്രങ്ങള്‍ തന്നെയാണ്. ഒരു കോളജിലെ വിദ്യാര്‍ഥികളുടെ ആവശ്യത്തിന് പരിഹാരംകാണാന്‍ അക്കാദമിക്ക് കൗണ്‍സിലിനും കോടതിക്കും മുന്നില്‍ ഹരജിയുമായി വരണമെന്ന് പറയുന്നത് പ്രായോഗികമല്ല. ബന്ധപ്പെട്ട മാനേജ്‌മെന്റുകള്‍ ന്യായമായ ആവശ്യങ്ങള്‍ അംഗീകരിക്കാതെ വരുമ്പോഴാണ് സമരരീതിയിലേക്ക് പോവാന്‍ വിദ്യാര്‍ഥികള്‍ നിര്‍ബന്ധിതരാവുന്നത്. പൊന്നാനി കോളജിലെ എസ്.എഫ്.ഐയുടെ അക്രമത്തെ മുന്‍നിര്‍ത്തി സംസാരിച്ച കോടതി, കേരളത്തിലെ മുഴുവന്‍ കലാലയങ്ങളിലെയും രാഷ്ട്രീയ പ്രവര്‍ത്തനത്തെ അടച്ചാക്ഷേപിച്ചത് അംഗീകരിക്കാന്‍ കഴിയില്ലെന്നും അദ്ദേഹം പറഞ്ഞു.