ന്യൂഡല്‍ഹി: സംഘ് പരിവാറിന്റെ ശക്തമായ പ്രതിരോധങ്ങള്‍ക്കിടെ ഡല്‍ഹിയിലെ 80 ശതമാനം ആളുകളും സുപ്രിം കോടതിയുടെ പടക്ക നിരോധനത്തെ അംഗീകരിച്ചതായി റിപ്പോര്‍ട്ട്. പടക്കം പൊട്ടിക്കാതെയാണ് ഇത്തവണ ദീപാവലി ആഘോഷിച്ചതെന്ന ഡല്‍ഹി നിവാസികള്‍ പറയുന്നു. പടക്കം പൊട്ടിക്കണമെന്ന് ആഗ്രമമുണ്ടായിരുന്നെങ്കിലും സുപ്രിം കോടതി ഉത്തരവ് അനുസരിക്കുകയായിരുന്നുവെന്നും അവര്‍ കൂട്ടിച്ചേര്‍ത്തു. പ്രദേശിക സര്‍വ്വേ നടത്തുന്നതിനിടെയാണ് പ്രദേശവാസികളുടെ പ്രതികരണം.

87 ശതമാനം ആളുകളും പടക്കം പൊട്ടിച്ച് ദീപാവലി ആഘോഷിക്കുന്നതില്‍ താല്‍പര്യമില്ലാത്തവരാണെന്നാണ് സര്‍വ്വെയില്‍ പറയുന്നത്. നാലു ശതമാനം ആളുകള്‍ തങ്ങള്‍ നേരത്തെ വാങ്ങിവെച്ച പടക്കങ്ങള്‍ പൊട്ടിക്കുമെന്ന് പ്രതികരിച്ചു. വെറും എട്ടു ശതമാനം മാത്രമാണ് സുപ്രിം കോടതി വിലക്ക് മറികടന്ന് പടക്കം പൊട്ടിക്കുമെന്ന് പ്രതികരിച്ചത്.

നഗരത്തിലെ മലിനീകരണം നിയന്ത്രിക്കുന്നതിന്റെ ഭാഗമായാണ് സുപ്രിം കോടതി ദീപാവലിക്ക് പടക്കം പൊട്ടിക്കുന്നതിന് വിലക്ക് ഏര്‍പെടുത്തിയത്. ലോകത്തു തന്നെ ഏറ്റവും കൂടുതല്‍ മലിനീകരണമുള്ള നഗരങ്ങളിലൊന്നാണ് ഡല്‍ഹി.