കളമശ്ശേരി: നഗരസഭയിലെ മാലിന്യ നിക്ഷേപ, നിര്‍മാര്‍ജന പ്രശ്‌നങ്ങള്‍ പരിഹരിക്കുന്നതിന് കര്‍ശന നടപടികള്‍ സ്വീകരിക്കാന്‍   നഗരസഭ കൗണ്‍സില്‍ യോഗം തീരുമാനിച്ചു.ഇതനുസരിച്ച് വീടുകളില്‍ നിന്ന് മാലിന്യം സ്വീകരിക്കുന്ന രീതി തുടരും.
എന്നാല്‍ പ്‌ളാസ്റ്റിക് മാലിന്യം മാസത്തില്‍ രണ്ട് പ്രാവശ്യം മാത്രമേ വീടുകളില്‍ നിന്നും വ്യാപാര സ്ഥാപനങ്ങളില്‍ നിന്നും സ്വീകരിക്കുകയുള്ളു.അതും പ്‌ളാസ്റ്റിക് മാലിന്യവും കഴുകി വ്യത്തിയാക്കിയ പ്‌ളാസ്റ്റിക് മാലിന്യവും വെവ്വേറെ കെട്ടിവച്ചിരുന്നാല്‍ മാത്രം.
നിലവില്‍ വഴിയില്‍ നിക്ഷേപിച്ചിട്ടുള്ള പ്‌ളാസ്റ്റിക് മാലിന്യം കിടക്കുന്ന സ്ഥലത്ത് തന്നെ വേര്‍തിരിച്ച് എടുക്കും. പ്‌ളാസ്റ്റിക് മാലിന്യം സൂക്ഷിക്കുന്നതിന് ഡംബിങ്ങ് യാര്‍ഡില്‍ നെറ്റ് കെട്ടി പ്രത്യേകം സ്ഥലം തിരിക്കും. നല്ല പ്‌ളാസ്റ്റിക് മാലിന്യം നഗരസഭ വില്‍ക്കും.
 വില്‍ക്കാന്‍ പറ്റാത്തവ പണം കൊടുത്ത് നീക്കും.ഇതിന് പ്രത്യേകം ടെണ്ടര്‍ ക്ഷണിക്കും.ഡംബിങ്ങ്  യാര്‍ഡിന് ഗേറ്റ് വയ്ക്കും. പകല്‍ മാത്രമേ തുറക്കുകയുള്ളു. വൈകീട്ട് അഞ്ചിന് അടക്കും.അടിയന്തിരമായി ഡംബിങ്ങ് യാര്‍ഡില്‍ സി സി ടി വി ക്യാമറ സ്ഥാപിക്കും.പിന്നീട് അനധികൃതമായി     മാലിന്യം തള്ളുന്ന സ്ഥലങ്ങളിലും ക്യാമറ വയ്ക്കും.വഴിയോര കച്ചവടക്കാരും തട്ടുകടക്കാരും മറ്റും അനധികൃതമായി തള്ളുന്ന മാലിന്യത്തെ കുറിച്ച് അന്വേഷണം നടത്തും, നടപടി സ്വീകരിക്കും.  
 ഹോട്ടലുകളില്‍ നടത്തുന്ന പരിശോധന തുടരുന്നതിനും തീരുമാനിച്ചു.മാലിന്യവുമായി ബന്ധപ്പെട്ട കാര്യങ്ങളില്‍ പരിശോധന നടത്തുന്നതിന് സബ് കമ്മിറ്റി രൂപീകരിച്ചു.
ഈ കമ്മിറ്റിയില്‍ കൗണ്‍സിലര്‍മാരും ആരോഗ്യ വിഭാഗം ഉദ്യോഗസ്ഥരും ഉണ്ട്. കൗണ്‍സില്‍ യോഗത്തില്‍ ചെയര്‍പേഴ്‌സണ്‍ ജസ്സി പീറ്റര്‍ അദ്ധ്യക്ഷത വഹിച്ചു.
വൈസ് ചെയര്‍മാന്‍ ടി എസ് അബൂബക്കര്‍ , ഹെന്നി ബേബി, സബീന ജബ്ബാര്‍, കെ എ സിധീഖ്, വി എസ് അബൂബക്കര്‍ ,ടി എ അബ്ദുല്‍ സലാം തുടങ്ങിയവര്‍ ചര്‍ച്ചയില്‍ പങ്കെടുത്തു.