കൊച്ചി: അത്യാസന്നനിലയിലായ നവജാത ശിശുവുമായി ആശുപത്രിയിലേക്കു പോയ ആംബുലന്‍സിന്റെ വഴി തടഞ്ഞ സംഭവത്തില്‍ വിചിത്രവാദവുമായി വാഹന ഉടമ. ആബുലന്‍സിനു പൈലറ്റ് പോയതാണെന്നാണു കാര്‍ ഡ്രൈവര്‍ നിര്‍മല്‍ ജോസ് പൊലിസിന് മൊഴി നല്‍കിയത്. ഇയാളെ പൊലിസ് നേരത്തെ അറസ്റ്റ് ചെയ്തിരുന്നു.

മറ്റു വാഹനങ്ങള്‍ ആംബുലന്‍സിനു മുന്നില്‍തടസമാകാതിരിക്കാനാണ് മുന്നില്‍ അമിതവേഗയില്‍ പോയതെന്നാണ് ഇയാള്‍ നല്‍കിയ വിശദീകരണം. എന്നാല്‍ ഇയാളുടെ വാക്കുകള്‍ പൊലിസ് മുഖവിലയ്‌ക്കെടുത്തിട്ടില്ല. സംഭവത്തില്‍ നിര്‍മലിന്റെ ഡ്രൈവിങ് ലൈസന്‍സ് സസ്‌പെന്‍ഡ് ചെയ്യാന്‍ തീരുമാനമായി.

അതേസമയം, കുഞ്ഞ് ഇപ്പോഴും തീവ്രപരിചരണ വിഭാഗത്തിലാണ്.

ചൊവ്വാഴ്ച്ചയാണ് സംഭവമുണ്ടായത്. ശ്വാസ തടസ്സത്തെ തുടര്‍ന്ന് അപകടത്തിലായ നവജാതശിശുവുമായി പെരുമ്പാവൂര്‍ താലൂക്ക് ആശുപത്രിയില്‍നിന്ന് കളമശേരി മെഡിക്കല്‍ കോളജിലേക്കു പോയ ആംബുലന്‍സിന്റെ മുന്നിലാണ് വഴിമാറാതെ കാര്‍ തടസ്സം സൃഷ്ടിച്ചത്.

15 മിനിറ്റുകൊണ്ട് കളമശേരിയിലെത്തേണ്ട ആംബുലന്‍ 35 മിനിറ്റുകൊണ്ടാണ് ആശുപത്രിയിലെത്തിയത്. ഏറെ നേരം ഹോര്‍ണടിച്ചിട്ടും സൈഡ് നല്‍കാന്‍ സ്ഥലമുണ്ടായിട്ടും കാറിന്റെ ഡ്രൈവര്‍ ഇതിന് തയാറായില്ല. ഹസാര്‍ഡ് ലൈറ്റ് ഓണ്‍ ചെയ്ത് കാര്‍ ആംബുലന്‍സിന്റെ മുന്നില്‍ കുതിക്കുകയായിരുന്നു.