ബ്രസീലിയ: ബ്രസീലില്‍ രാജ്യവ്യാപകമായി നടന്ന വന്‍ പീഡിഫീലിയാവേട്ടയില്‍ 108 പേരെ അറസ്റ്റ് ചെയ്തു. തലസ്ഥാനമായ ബ്രസീലിയയിലും 24 സംസ്ഥാനങ്ങളിലും നടന്ന വേട്ടയിലാണ് ഇത്രയും പേര്‍ പിടിയിലായത്.
കുട്ടികളെ ലൈംഗിക ആവശ്യങ്ങള്‍ക്ക് ഉപയോഗിക്കുന്ന മനോവൈകൃതത്തിനാണ് പീഡോഫീലിയ എന്നു പറയുന്നത്. അറസ്റ്റിലായവര്‍ കുട്ടികളെ ഉപയോഗിച്ചുള്ള ലൈംഗിക അതിക്രമങ്ങള്‍ നടത്തുന്ന ശൃംഖലയില്‍ കണ്ണികളാണെന്ന് നീതിന്യായ വകുപ്പു മന്ത്രി ടോര്‍ക്വാറ്റോ ജാര്‍ദിം പറഞ്ഞു. കുട്ടികളുടെ അശ്ലീലചിത്രങ്ങളും വിഡിയോകളും ഇവര്‍ മൊബൈല്‍ ഫോണുകള്‍ വഴിയും കംപ്യൂട്ടര്‍ വഴിയും പ്രചരിപ്പിക്കുന്നതായും അന്വേഷണത്തില്‍ കണ്ടെത്തിയതായി അദ്ദേഹം പറഞ്ഞു.
അറസ്റ്റിലായവരില്‍ വിരമിച്ച പൊലിസ് ഉദ്യോഗസ്ഥരും സര്‍ക്കാര്‍ ഉദ്യോഗസ്ഥരും ഫുട്‌ബോള്‍ യൂത്ത് ക്ലബ് നേതാക്കളും ഉള്‍പ്പെടുമെന്ന് സര്‍ക്കാര്‍വൃത്തങ്ങള്‍ അറിയിച്ചു. ആറു മാസം നീണ്ട അന്വേഷണത്തിനൊടുവിലാണ് രാജ്യവ്യാപകമായ റെയ്ഡ് നടന്നത്. യു.എസ്, യൂറോപ്യന്‍ എമിഗ്രേഷന്‍ അധികൃതരും അന്വേഷണത്തില്‍ പങ്കാളികളാണ്. 1,50,000ത്തോളം കുട്ടികളുടെ അശ്ലീലചിത്രങ്ങളും വിഡിയോകളും സംഘം കണ്ടെത്തിയിട്ടുണ്ട്. പൊലിസിന്റെ കണ്ണുവെട്ടിക്കാന്‍ സഹായിക്കുന്ന അത്യാധുനിക സാങ്കേതിക സംവിധാനങ്ങള്‍ ഉപയോഗിച്ചാണ് സംഘം ഇത്തരം വിഡിയോകള്‍ പകര്‍ത്തുന്നതും പ്രചരിപ്പിക്കുന്നതുമെന്ന് അന്വേഷണസംഘം പറയുന്നു.
നൂറുകണക്കിന് കംപ്യൂട്ടറുകള്‍, മൊബൈല്‍ ഫോണുകള്‍, സി.ഡികള്‍, ഹാര്‍ഡ് ഡ്രൈവുകള്‍ എന്നിവയും പൊലിസ് പിടിച്ചെടുത്തിട്ടുണ്ട്.