പാലാ: ട്രാക്കില്‍ നിന്ന് റോഡിലേക്ക് നടത്തം മാറ്റിയിട്ടും പാലക്കാട്ടുകാരെ പാലായിലും നടന്ന് തോല്‍പ്പിക്കാന്‍ ആളില്ല. പതിവു പോലെ നടത്തത്തില്‍ പാലാക്കാടന്‍ ആധിപത്യം തുടരുന്നു. അണ്ടര്‍ 17, 19 വിഭാഗം പെണ്‍കുട്ടികളുടെയും ആണ്‍കുട്ടികളുടെയും നടത്തത്തില്‍ നാല് സ്വര്‍ണ പതക്കവും പാലക്കാടിന്റെ താരങ്ങള്‍ സ്വന്തമാക്കി. പറളി, മുണ്ടൂര്‍, കല്ലടി സ്‌കൂളുകളിലെ താരങ്ങളാണ് സുവര്‍ണ നേട്ടം നടന്നെടുത്തത്.
12 മെഡലുകളില്‍ എട്ടും പാലക്കാടിന് സ്വന്തം. മുന്‍ വര്‍ഷങ്ങളില്‍ നിന്ന് വ്യത്യസ്തമായി ഇത്തവണ റോഡിലായിരുന്നു മത്സരം. അണ്ടര്‍ 19 ആണ്‍കുട്ടികളില്‍ മാത്രമാണ് പാലക്കാടിന് സ്വര്‍ണം നഷ്ടമായത്. എറണാകുളം മാതിരപ്പിള്ളി സ്‌കൂളിലെ വി.കെ അഭിജിത്ത് 22:06.50 സെക്കന്‍ഡില്‍ സ്വര്‍ണം നേടി. പാലക്കാട് പറളി സ്‌കൂളിലെ സി.ടി നിതീഷ് 22:11.30 സെക്കന്‍ഡില്‍ വെള്ളിയും തിരുവനന്തപുരം സായിയുടെ പി പ്രകാശ് (23:23.60) വെങ്കലവും നേടി. അണ്ടര്‍ 19 പെണ്‍കുട്ടികളില്‍ മുണ്ടൂര്‍ എച്ച്.എസിലെ സി.കെ ശ്രീജ സ്വര്‍ണം നിലനിര്‍ത്തി. 25:20.60 സെക്കന്‍ഡിലായിരുന്നു ശ്രീജ അഞ്ച് കിലോ മീറ്റര്‍ നടന്നു തീര്‍ത്തത്. മാതിരപ്പിള്ളിയുടെ ആശ സോമന്‍ 25:33.30 സെക്കന്‍ഡില്‍ വെള്ളി നേടി.
മുണ്ടൂരിലെ എസ് വൈദേഹി (25:51.30) വെങ്കലം നേടി. അണ്ടര്‍ 17 പെണ്‍കുട്ടികളുടെ മൂന്ന് കിലോ മീറ്റര്‍ നടത്തത്തില്‍ ദേശീയ റെക്കോര്‍ഡിനേക്കാളും മികച്ച പ്രകടനവുമായി നിലവിലെ ചാംപ്യന്‍ കല്ലടി സ്‌കൂളിലെ സാന്ദ്ര സുരേന്ദ്രന്‍ വീണ്ടും പൊന്നണിഞ്ഞു. 15:05.80 സെക്കന്‍ഡില്‍ അനായാസമായിരുന്നു സാന്ദ്രയുടെ സ്വര്‍ണ നേട്ടം. പതിവ് പോലെ സാന്ദ്രയ്ക്ക് പിന്നില്‍ ഫിനിഷ് ചെയ്ത് സഹപാഠിയും കൂട്ടുകാരിയുമായ കെ അക്ഷയ വെള്ളി നേടി. സമയം: 15:07.30 സെക്കന്‍ഡ്. മുണ്ടൂര്‍ എച്ച്.എസ്.എസിലെ ആര്‍ ഗോപിക (15:34.30) വെങ്കലം നേടി. ആണ്‍കുട്ടികളില്‍ നിലവിലെ റെക്കോര്‍ഡ് ഉടമയായ കല്ലടി സ്‌കൂളിലെ അശ്വിന്‍ ശങ്കറെ മൂന്നാം സ്ഥാനത്തേക്ക് പിന്തള്ളി പറളിയുടെ ഡി.കെ നിശാന്ത് 22:53.40 സെക്കന്‍ഡില്‍ സ്വര്‍ണം നടന്നെടുത്തു. കണ്ണൂര്‍ എളയാവൂര്‍ സി.എച്ച്.എം.എച്ച്.എസ്.എസിലെ മുഹമ്മ് അഫ്ഷാന്‍ 23:34.70 സെക്കന്‍ഡില്‍ വെള്ളി നേടി.