കല്‍പ്പറ്റ: പ്രശസ്ത കവി വയലാര്‍ രാമവര്‍മയുടെ 42-ാം ചരമ വാര്‍ഷിക ദിനത്തോടനുബന്ധിച്ച് ഈമാസം 29ന് നന്മ വൈത്തിരി യൂനിറ്റിന്റെ ആഭിമുഖ്യത്തില്‍ അനുസ്മരണം നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. വയലാറിന്റെ സൃഷ്ടികള്‍ പുതുതലമുറക്ക് പകര്‍ന്നു നല്‍കുക, വളര്‍ന്നു വരുന്ന കലാകാരന്മാരെ പ്രോത്സാഹിപ്പിക്കുക തുടങ്ങിയ ലക്ഷ്യങ്ങളുമായാണ് പരിപാടി നടത്തുന്നത്. പരിപാടിയുടെ ഭാഗമായി നന്മ അംഗങ്ങളുടെ കുടുംബ സംഗമവും അനുമോദന ചടങ്ങും നടക്കും. സംസ്ഥാന അധ്യാപക അവാര്‍ഡ് ജേതാവ് ജയരാജന്‍ മാസ്റ്റര്‍, പോസ്റ്റ് മാസ്റ്റര്‍ അജിതാ ദാസ്, ചിഞ്ചു ചിത്രകുമാര്‍, ആര്‍ദ്ര മിനില്‍, അശ്വിന്‍ദാസ് അര്‍ച്ചന ബാലകൃഷ്ണന്‍ എന്നിവരെയാണ് ചടങ്ങില്‍ ആദരിക്കുക. ഞായറാഴ്ച വൈകിട്ട് മൂന്നിന് വൈത്തിരി സര്‍വിസ് സഹകരണ ബാങ്ക് ഓഡിറ്റോറിയത്തില്‍ നടക്കുന്ന പരിപാടി വൈത്തിരി പഞ്ചായത്ത് പ്രസിഡന്റ് വി. ഉഷാകുമാരി ഉദ്ഘാടനം ചെയ്യും. വൈത്തിരി വില്ലേജ് റിസോര്‍ട്ട് എം.ഡി എന്‍.കെ മുഹമ്മദ് മുഖ്യാതിഥിയാകും. എഴുത്തുകാരന്‍ ഭാസ്‌കരന്‍ ബത്തേരി മുഖ്യപ്രഭാഷണം നടത്തും. വാര്‍ത്താസമ്മേളനത്തില്‍ നന്മ പ്രസിഡന്റ് എസ്. ചിത്രകുമാര്‍, രക്ഷാധികാരി ഉദയകുമാര്‍ തളിമല, കോഡിനേറ്റര്‍ കെ.കെ അജയന്‍ എന്നിവര്‍ പങ്കെടുത്തു.