അങ്ങാടിപ്പുറം: സ്‌കൂളിലേക്ക് പ്ലാസ്റ്റിക് കവര്‍ ചോദിച്ചെത്തിയ യുവാവ് സ്റ്റാഫ് റൂമിലെ അധ്യാപികയുടെ ബാഗുമായി കടന്നുകളഞ്ഞു. വളാഞ്ചേരി റോഡില്‍ കോട്ടപ്പറമ്പ എല്‍.പി സ്‌കൂളില്‍ ഇന്നലെ ഉച്ചക്ക് പന്ത്രണ്ടോടെയാണ് സംഭവം. സ്‌കൂളിലെ പാചകക്കാരിയോട് പ്ലാസ്റ്റിക് കവര്‍ ചോദിച്ചെത്തിയ യുവാവ് പാചകക്കാരിയില്‍ നിന്നും കവര്‍ വാങ്ങിയ ശേഷം തുറന്നിട്ട സ്റ്റാഫ് റൂമില്‍ കയറി ബാഗ് മോഷ്ടിച്ച് കടന്നുകളയുകയായിരുന്നു.
സ്‌കൂള്‍ കെട്ടിടത്തിന്റെ ജോലികള്‍ പുരോഗമിക്കുന്നതിനാല്‍ സ്റ്റാഫ് റൂമിന്റെ വാതില്‍ തുറന്നിടാറാണ് പതിവ്. എന്നാല്‍ തക്കംനോക്കിയ യുവാവ് സ്‌കൂളില്‍ കയറി ബാഗ് മോഷ്ടിച്ച് പള്‍സര്‍ ബൈക്കില്‍ കയറി രക്ഷപ്പെടുകയായിരുന്നു. സമീപത്തെ വ്യാപാര സ്ഥാപനത്തിലെ സി.സി.ടി.വിയില്‍ മോഷ്ടാവ് ബൈക്കില്‍ കടന്നുകളയുന്ന ദൃശ്യം പതിഞ്ഞിട്ടുണ്ട്. മൊബൈല്‍ ഫോണും പണവും പുസ്തകങ്ങളുമടങ്ങുന്ന ബാഗാണ് സ്‌കൂളില്‍ നിന്നും നഷ്ടമായത്. ബാഗ് നഷ്ടമായ അധ്യാപിക പെരിന്തല്‍മണ്ണ പൊലിസില്‍ പരാതി നല്‍കി.