മട്ടന്നൂര്‍: കുന്നിടിച്ച മണ്ണുമായി മട്ടന്നൂര്‍ നഗരത്തില്‍ ടിപ്പര്‍ ലോറികള്‍ തലങ്ങും വിലങ്ങും ചീറിപ്പായുന്നു. ജെസിബി ഉപയോഗിച്ച് കുന്നിടിച്ച് ലോറികളില്‍ കൊണ്ടുപോകുമ്പോള്‍ ടാര്‍പോളിന്‍ ഉപയോഗിച്ച് മറയ്ക്കാതെ കൊണ്ടുപോവുന്നതാണ് മറ്റ് വാഹനങ്ങള്‍ക്കും പൊതുജനങ്ങള്‍ക്കും പ്രയാസമുണ്ടാക്കുന്നത്. ലോറികളില്‍ നിര്‍മാണ സാമഗ്രികളടക്കമുള്ളവ കൊണ്ടുപോകുമ്പോള്‍ നിര്‍ബന്ധമായും മറയ്ക്കണമെന്ന് നിര്‍ദേശമുണ്ട്. ഇത് ലംഘിച്ച് വാഹനമോടിച്ചാല്‍ ശക്തമായ നടപടി സ്വീകരിക്കുമെന്ന് പോലിസ് നേരത്തെ പലതവണ മുന്നറിയിപ്പ് നല്‍കിയിരുന്നു. എന്നാല്‍ ഇത്തരം നിര്‍ദേശം പാലിക്കാന്‍ പല ഡ്രൈവര്‍മാരും തയ്യാറാകാത്താണ് ഈ അവസ്ഥയ്ക്ക് കാരണം. ടിപ്പറുകളുടെ ഇത്തരം സര്‍വിസുകള്‍ കാരണം ഇരുചക്രവാഹനങ്ങള്‍ക്കും കാല്‍നടയാത്രയ്ക്കാര്‍ക്കും പുറത്തിറങ്ങി നടക്കാന്‍ കഴിയാത്ത അവസ്ഥയാണ്. മറയ്ക്കാതെ മണ്ണ് കൊണ്ടു പോകുന്ന വാഹനങ്ങള്‍ കസ്റ്റഡിയിലെടുക്കണമെന്നാണ് നാട്ടുകാരുടെ ആവശ്യം.