കൃഷ്ണഗിരി (വയനാട്): സി.കെ നായിഡു അണ്ടര്‍ 23 ടൂര്‍ണമെന്റില്‍ മുംബൈക്കെതിരേ ആദ്യ ഇന്നിങ്‌സില്‍ കേരളം 322ന് പുറത്ത്. മറുപടി ബാറ്റിങ്ങിനിറങ്ങിയ മുംബൈ വിക്കറ്റുകള്‍ നഷ്ടപ്പെടാതെ 54 റണ്‍സെടുത്ത് നില്‍ക്കെ എത്തിയ മഴ രണ്ടാം ദിവസത്തെ കളി തടസപ്പെടുത്തി. തലേന്നത്തെ സ്‌കോറിനൊപ്പം 97 റണ്‍സ് കൂട്ടിച്ചേര്‍ക്കവെ കേരളത്തിന്റെ ബാക്കി അഞ്ച് വിക്കറ്റുകളും മുംബൈ ബൗളര്‍മാര്‍ പിഴുതു. സല്‍മാന്‍ നിസാറിന്റെ അര്‍ധ സെഞ്ച്വറിയും വാലറ്റത്ത് പൊരുതി പുറത്താകാതെ നിന്ന ആനന്ദ് ജോസഫിന്റെ 43 റണ്‍സുമാണ് കേരളത്തിന് പൊരുതാനുള്ള ടോട്ടല്‍ സമ്മാനിച്ചത്. മുംബൈക്കായി ഷംസ് മുലാനി നാലും തുഷാര്‍ ദേശ്പാണ്ഡെ മൂന്നും നായകന്‍ ജെയ് ബിസ്റ്റ രണ്ടും വിക്കറ്റുകള്‍ വീഴ്ത്തി. മഴ കളി മുടക്കുമ്പോള്‍ 34 റണ്‍െസെടുത്ത് ജെയ് ബിസ്റ്റയും 15 റണ്‍െസെടുത്ത ഹാര്‍ദിക് തമോറുമാണ് ക്രീസില്‍. ഇന്ന് ഒരു ദിവസംകൊണ്ട് മുംബൈയുടെ മുഴുവന്‍ വിക്കറ്റുകളും വീഴ്ത്തി ഒന്നാമിന്നിങ്‌സ് ലീഡ് നേടാനാകും കേരളം ശ്രമിക്കുക.