ന്യൂഡല്‍ഹി: ഹാദിയ കേസില്‍ ഹാദിയയുടെ ഭര്‍ത്താവിനെതിരേ പിതാവ് അശോകന്‍ ഹരജിയുമായി സുപ്രിം കോടതിയില്‍. ഭര്‍ത്താവായ ഷെഫിന്‍ ജഹാന് തീവ്രവാദ ബന്ധമുണ്ടെന്നും പോപുലര്‍ഫ്രണ്ട് ഹാദിയ വിഷയം ഉപയോഗിച്ച് വ്യാപക പിരിവ് നടത്തുകയാണെന്നും ഹരജിയില്‍ ആരോപിക്കുന്നു. ഹാദിയ കേസ് തിങ്കളാഴ്ച പരിഗണിക്കാനിരിക്കേയാണ് ഹാദിയയുടെ പിതാവായ അശോകന്‍ വീണ്ടും കോടതിയിലെത്തിയത്.

ഹൈക്കോടതിയില്‍ നേരത്തെ ഉന്നയിച്ച ആരോപണങ്ങളാണ് ഹാദിയയുടെ പിതാവായ അശോകന്‍ ഇപ്പോള്‍ സുപ്രിം കോടതിയില്‍ സമര്‍പ്പിച്ച ഹരജിയിലും ഉന്നയിച്ചിരിക്കുന്നത്. ഹാദിയയ്ക്ക് വീട്ടില്‍ മനുഷ്യാവകാശ ലംഘനം നേരിടുന്നുവെന്ന് പൊലിസിന് കണ്ടെത്താന്‍ കഴിഞ്ഞിട്ടില്ലെന്നും ഇത് സംസ്ഥാന മനുഷ്യാവകാശ കമ്മീഷണന്‍ കെ.മോഹന്‍ കുമാര്‍ വ്യക്തമാക്കിയതായി ഹരജിയില്‍ അശോകന്‍ ചൂണ്ടിക്കാട്ടുന്നുണ്ട്.

എന്നാല്‍, കഴിഞ്ഞ ദിവസമാണ് പിതാവ് തന്നെ മര്‍ദ്ദിക്കുന്നുണ്ടെന്നും എത്രയും പെട്ടെന്ന് തന്നെ വീട്ടില്‍ നിന്നും മോചിപ്പിക്കണമെന്നും അല്ലെങ്കില്‍ താന്‍ കൊല്ലപ്പെടാമെന്നും ഹാദിയ രാഹുല്‍ ഈശ്വറിനോട് പറയുന്ന വീഡിയോ രാഹുല്‍ ഈശ്വര്‍ പുറത്തുവിട്ടത്. മുന്‍പ് രാഹുല്‍ ഈശ്വര്‍ ഹാദിയയെ സന്ദര്‍ശിച്ച സമയത്തെടുത്ത വീഡിയോ കഴിഞ്ഞ ദിവസം രാഹുല്‍ ഈശ്വര്‍ പുറത്തുവിട്ടത്.