കോയമ്പത്തൂര്‍: സര്‍ക്കാര്‍ ആശുപത്രിയില്‍ മരിച്ചെന്ന് ഡോക്ടര്‍മാര്‍ വിധിയെഴുതിയ നവജാജ ശിശുവിന് പുനര്‍ജന്മം. മരിച്ചെന്ന് പറഞ്ഞതോടെ ശ്മശാനത്തില്‍ മറവ് ചെയ്യാനുള്ള ഒരുക്കത്തിനിടയിലാണ് കുഞ്ഞ് കരഞ്ഞത്. തുടര്‍ന്ന് കുട്ടിയെ ഉടന്‍ ആശുപത്രിയിലെത്തിച്ചു. ക്ഷുഭിതരായ നാട്ടുകാര്‍ ആശുപത്രിക്ക് മുന്നില്‍ പ്രതിഷേധിച്ചു. ഡോക്ടര്‍ക്കെതിരേ അന്വേഷണം തുടങ്ങി.
ദിണ്ടിക്കല്‍ മാരിയനാഥപുരത്തിലെ കുളന്തരാജ്-മാരിയ വിനീത ദമ്പതികളുടെ കുഞ്ഞാണ് ജീവിതത്തിലേക്ക് തിരിച്ചുകയറിയത്. പ്രസവിച്ച ശേഷം കുഞ്ഞിന് ചലനമുണ്ടായിരുന്നില്ല. ഇതോടെ കുട്ടി ചാപിള്ളയാണെന്ന് ഡോക്ടര്‍മാര്‍ പറഞ്ഞു. തുടര്‍ന്ന് മൃതദേഹം ശ്മശാനത്തില്‍ അടക്കം ചെയ്യാനായി കുഴിയിലിറക്കാന്‍ നേരത്താണ് കുഞ്ഞ് കരച്ചില്‍ തുടങ്ങിയത്.