തിരൂര്‍: കൂട്ടായി പ്രാഥമിക ആരോഗ്യ കേന്ദ്രത്തിലെ സ്റ്റാഫ് നഴ്‌സിനെ മാനഭംഗപ്പെടുത്താന്‍ ശ്രമിച്ച കേസില്‍ ഒളവിലായിരുന്ന പ്രതി അറസ്റ്റില്‍. വാക്കാട് സ്വദേശി ഐയ്ദുവിന്റെ പുരക്കല്‍ മന്‍സൂറി (22) നെയാണ് തിരൂര്‍ എസ്.ഐ സുമേഷ് സുധാകറിന്റെ നേതൃത്വത്തിലുള്ള പൊലിസ് അറസ്റ്റ് ചെയ്തത്.
ഞായറാഴ്ച രാത്രി വാക്കാടു നിന്നാണ് ഇയാളെ പൊലിസ് കസ്റ്റഡിയിലെടുത്തത്. കഴിഞ്ഞ 14 നാണ് പ്രതി പ്രാഥമികാരോഗ്യ കേന്ദ്രത്തില്‍ ഡ്യൂട്ടിയിലുണ്ടായിരുന്ന നഴ്‌സിനെ രാവിലെ ഒന്‍പതോടെ കയറിപ്പിടിച്ച് മാനഭംഗം ചെയ്യാന്‍ ശ്രമിച്ചത്. സംഭവത്തിന് ശേഷം ഒളിവില്‍ പോയ മന്‍സൂര്‍ കോടതിയില്‍ നിന്ന് മുന്‍കൂര്‍ ജാമ്യത്തിന് ശ്രമിച്ചിരുന്നു. പ്രതിയെ അറസ്റ്റ് ചെയ്യാന്‍ വൈകുന്നതിനെതിരേ കേരള ഗവ.നഴ്‌സസ് അസോസിയേഷന്റെ നേതൃത്വത്തില്‍ സര്‍ക്കാര്‍ നഴ്‌സുമാര്‍ പ്രതിഷേധവുമായി രംഗത്തുവരികയും അസോസിയേഷന്റെ സംസ്ഥാന നേതൃത്വത്തിന്റെ പിന്തുണയോടെ മുഖ്യമന്ത്രിയ്ക്കും ഉന്നത പൊലിസ് ഉദ്യോഗസ്ഥര്‍ക്കും പരാതി നല്‍കുകയും ചെയ്തിരുന്നു.