കൊടുവള്ളി: എം.എല്‍.എമാരായ പി.ടി.എ റഹീം, കാരാട്ട് റസാഖ്, കൊടുവള്ളി നഗരസഭാ കൗണ്‍സിലര്‍ കാരാട്ട് ഫൈസല്‍ എന്നിവര്‍ക്ക് ഹവാലാ മാഫിയയുമായുള്ള ബന്ധം പുറത്തുവന്ന സാഹചര്യത്തില്‍ തല്‍സ്ഥാനങ്ങള്‍ രാജിവച്ച് ജനങ്ങളോട് മാപ്പുപറയണമെന്ന് മുസ്‌ലിം യൂത്ത് ലീഗ് കൊടുവള്ളി മണ്ഡലം ഭാരവാഹികള്‍ വാര്‍ത്താ സമ്മേളനത്തില്‍ ആവശ്യപ്പെട്ടു.
ഡി.ആര്‍.ഐ അന്വേഷിക്കുന്ന സ്വര്‍ണക്കടത്ത് കേസിലെ പ്രതിയായ കാരാട്ട് ഫൈസലിനെ സംരക്ഷിക്കുന്നുവെന്ന് പരസ്യപ്രഖ്യാപനം നടത്തിയ എം.എല്‍.എമാര്‍ സത്യപ്രതിജ്ഞാ ലംഘനമാണ് നടത്തിയത്.
സ്വര്‍ണക്കടത്ത് കേസില്‍ ഉള്‍പ്പെടുകയും 30 ലക്ഷം രൂപയോളം വിലവരുന്ന ആഡംബര കാര്‍ നികുതിവെട്ടിച്ച് ഉപയോഗിച്ചതിന് അന്വേഷണം നേരിടുകയും ചെയ്യുന്ന കാരാട്ട് ഫൈസലിന് ജനപ്രതിനിധിയായി തുടരാന്‍ അവകാശമില്ലെന്നും യൂത്ത് ലീഗ് ആരോപിച്ചു. കെ.എം.ഒ കോളജ് വിദ്യാര്‍ഥികളെ ആക്രമിച്ച കാരാട്ട് റസാഖ് എം.എല്‍.എയെ അറസ്റ്റ് ചെയ്യാന്‍ തയാറായില്ലെങ്കില്‍ ശക്തമായ പ്രക്ഷോഭത്തിന് യൂത്ത് ലീഗ് നേതൃത്വം നല്‍കുമെന്നും നേതാക്കള്‍ വ്യക്തമാക്കി.
വാര്‍ത്താസമ്മേളനത്തില്‍ മണ്ഡലം യൂത്ത് ലീഗ് പ്രസിഡന്റ് ടി. മൊയ്തീന്‍ കോയ, ജനറല്‍ സെക്രട്ടറി കെ.കെ റഫീഖ്, ട്രഷറര്‍ സി.കെ.എ റസാഖ്, ഭാരവാഹികളായ പി. അനീസ്, നൗഷാദ് പന്നൂര്‍, ഒ.കെ ഇസ്മായില്‍, ഇഖ്ബാല്‍ കത്തറമ്മല്‍, എന്‍.കെ മുഹമ്മദലി പങ്കെടുത്തു.