മറയൂര്‍: മറയൂര്‍ മേഖലയില്‍ നിരവധി മോഷണങ്ങള്‍ നടത്തിവരുന്നതിനിടെ പിടികൂടി ജുവനൈല്‍ ഹോമിലാക്കിയിട്ടും അവിടെ നിന്ന് തടവുചാടിയ കൗമാരക്കാരന്‍ പൊലിസ് വലയിലായി. ഈ മാസം അഞ്ചിനാണ് നാച്ചിവയല്‍ സ്വദേശിയായ കൗമാരക്കാരന്‍ തിരൂവഞ്ചൂര്‍ ജുവനൈല്‍ ഹോമില്‍ നിന്ന് ഓടി രക്ഷപ്പെട്ടത്.
കഴിഞ്ഞ ദിവസം രാത്രി മുരുകന്‍ പാറയിലെ മുനിയറക്കുള്ളില്‍ നിന്നും മറയൂര്‍ പൊലിസ് പിടികൂടുകയായിരുന്നു. സഹായഗിരി സെന്റ് മേരീസ് പള്ളി വികാരിയുടെ ബൈക്ക് മോഷണം നടത്തിയെങ്കിലും പ്രായം കണക്കിലെടുത്ത് പള്ളി അധികൃതര്‍ പരാതി പിന്‍വലിച്ചിരുന്നു. പിന്നീട് രണ്ടാഴ്ച്ചക്കുശേഷം മുനിയറ ഭാഗത്ത് നിന്ന് വീടുകള്‍ക്ക് സമീപം റോഡരുകില്‍ പാര്‍ക്ക് ചെയ്യുന്ന ഓട്ടോറിക്ഷകളിലെ നിരവധി സ്റ്റെപ്പിനി, ടേപ്പ് റിക്കോഡര്‍, മറ്റ് സാധനങ്ങള്‍ എന്നിവ മോഷണം നടത്തിയതിന് നാട്ടുകാര്‍ പിടികൂടി പൊലിസില്‍ ഏല്‍പ്പിക്കുകയായിരുന്നു. മറയൂര്‍ പൊലിസ് പിടികൂടിയ കൗമാരക്കാരനെ അയര്‍ക്കുന്നം പൊലിസിനു കൈമാറി.