കട്ടപ്പന: ശക്തമായ മിന്നലില്‍ വീട് തകര്‍ന്നു. ഇന്നലെ ഉച്ചയ്ക്കുശേഷം ഉണ്ടായ ഇടിമിന്നലില്‍ കട്ടപ്പന പൂവേഴ്‌സ് മൗണ്ട് കുന്നുംപുറത്ത് ജയിന്റെ വീടാണ് തകര്‍ന്നത്. വീട്ടിലെ രണ്ട് മുറിയും അടുക്കളയും മേല്‍ക്കൂരയും വയറിങ്ങും കത്തി നശിച്ചു.
വീടിനു സമീപത്തെ കൃഷിയിടത്തിലും ഇടിയേറ്റു. ഇടിയേറ്റപ്പോള്‍ വീട്ടുകാര്‍ വീട്ടില്‍ ഉണ്ടായിരുന്നെങ്കിലും അപകടമൊഴിവായി. ഇടിമിന്നലില്‍ സമീപത്തെ വീടുകളിലെ ഇലക്ട്രോണിക് ഉപകരണങ്ങളും തകരാറിലായി. പൂവേഴ്‌സ് മൗണ്ട് കുരിശുപള്ളിയുടെ വയറിങ് പൂര്‍ണമായും നശിച്ചു. മൂന്നുലക്ഷം രൂപയുടെ നഷ്ടം കണക്കാക്കുന്നു. പാമ്പാടുംപാറ വില്ലേജ് ഓഫിസര്‍, കട്ടപ്പന നഗരസഭാംഗം സിബി പറപ്പായില്‍, വാര്‍ഡംഗം ഷാജി മരുതോലില്‍ സ്ഥലം സന്ദര്‍ശിച്ചു.