ഗസ്സ: ഗസ്സ തുരങ്കത്തിനുനേരെ ഇസ്‌റാഈല്‍ നടത്തിയ ആക്രമണത്തില്‍ ചുരുങ്ങിയത് ഏഴു ഫലസ്ഥീനികള്‍ കൊല്ലപ്പെട്ടു. ഒന്‍പതു പേര്‍ക്കു പരുക്കേറ്റു. തിങ്കളാഴ്ച രാത്രി വൈകിയായിരുന്നു ആക്രമണം നടന്നത്.
മിസൈല്‍ ആക്രമണമാണ് ഇസ്‌റാഈല്‍ നടത്തിയത്. പ്രദേശത്തേക്ക് അഞ്ചിലേറെ മിസൈലുകള്‍ തൊടുത്തെന്നാണ് റിപ്പോര്‍ട്ടുകള്‍. കൊല്ലപ്പെട്ടവരില്‍ അഞ്ചുപേര്‍ അല്‍ ഖുദ്‌സ് സൈനികരും രണ്ടുപേര്‍ ഹമാസ് പോരാളികളുമാണെന്നു സ്ഥിരീകരിച്ചിട്ടുണ്ട്.
അതേസമയം, സംഭവത്തില്‍ രോഷം രേഖപ്പെടുത്തിയ ഹമാസ്, ഫത്ഹ് വിഭാഗങ്ങള്‍, ഇസ്‌റാഈലിനു ശക്തമായ തിരിച്ചടി നല്‍കുമെന്നും വ്യക്തമാക്കിയിട്ടുണ്ട്. ഫലസ്ഥീന്‍ പ്രസിഡന്റ് മഹ്മൂദ് അബ്ബാസ് അടിയന്തര യോഗം വിളിച്ചിട്ടുണ്ട്. ആക്രമണങ്ങളെ പ്രതിരോധിക്കുമെന്നും അതു തങ്ങളുടെ അവകാശമാണെന്നും ഇസ്‌ലാമിക് ജിഹാദ് മൂവ്‌മെന്റ് നേതാവ് ദാവൂദ് ശബാബ് പറഞ്ഞു.
തുരങ്കം ഇസ്‌റാഈലി വ്യോമസേന ആക്രമിക്കുകയായിരുന്നെന്ന് ഫലസ്ഥീന്‍ മാധ്യമങ്ങളും റിപ്പോര്‍ട്ട് ചെയ്തു.
ഈ തുരങ്കങ്ങള്‍ തങ്ങളുടെ അതിര്‍ത്തിയിലാണെന്നാണ് ഇസ്‌റാഈലിന്റെ വാദം.