ന്യൂഡല്‍ഹി: പാമ്പാടി നെഹ്‌റു കോളജ് വിദ്യാര്‍ഥി ജിഷ്ണു പ്രണോയ് ദുരൂഹസാഹചര്യത്തില്‍ മരിച്ച കേസിന്റെ അന്വേഷണ പുരോഗതി കേരളം സുപ്രിം കോടതിയെ അറിയിച്ചു. നെഹ്‌റു കോളജില്‍ നിന്ന് പിടിച്ചെടുത്ത ഹാര്‍ഡ് ഡിസ്‌ക്കിന്റെ പരിശോധനാ ഫലത്തിനായി കാത്തിരിക്കുകയാണെന്ന് സര്‍ക്കാര്‍ സമര്‍പ്പിച്ച റിപ്പോര്‍ട്ടില്‍ പറയുന്നു.
കഴിഞ്ഞമാസം കേസ് പരിഗണിക്കവെ അന്വേഷണ റിപ്പോര്‍ട്ട് സമര്‍പ്പിക്കാന്‍ നിര്‍ദേശിച്ചതിന്റെ അടിസ്ഥാനത്തിലാണ് കേരളത്തിന്റെ നടപടി. കോളജില്‍ നിന്ന് പിടിച്ചെടുത്ത ഹാര്‍ഡ് ഡിസ്‌ക് ഗുജറാത്തിലെ ഡയരക്ടറേറ്റ് ഓഫ് ഫോറന്‍സിക് സയന്‍സ് ലബോറട്ടറിയില്‍ പരിശോധനയ്ക്കയച്ചിരിക്കുകയാണ്. ജിഷ്ണുവിന്റേതെന്ന് പറയപ്പെടുന്ന മാപ്പപേക്ഷകളിലെ കൈയക്ഷരം മുഴുവനായും ജിഷ്ണുവിന്റേതല്ല.
പ്രണോയ് എന്നെഴുതിയതില്‍ മാത്രമേ സാമ്യമുള്ളൂ. അന്വേഷണം സി.ബി.ഐക്ക് വിടാന്‍ സര്‍ക്കാര്‍ ഉത്തരവിറക്കിയ കാര്യവും റിപ്പോര്‍ട്ടില്‍ പരാമര്‍ശിക്കുന്നുണ്ട്. കോളജിലെ സി.സി.ടി.വി ദൃശ്യങ്ങളും ലഭിച്ച രണ്ട് സിം കാര്‍ഡുകളും മെമ്മറി കാര്‍ഡും പരിശോധനയ്ക്ക് വിധേയമാക്കി. ഇതിന്റെ വിവരങ്ങളും റിപ്പോര്‍ട്ടിലുണ്ട്. ജിഷ്ണു കേസ് സി.ബി.ഐക്ക് വിട്ടുള്ള ഉത്തരവിന്റെ കാര്യവും റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്.