നാദാപുരം: നാദാപുരത്ത് യുവാക്കള്‍ തമ്മിലുണ്ടായ കത്തിക്കുത്തില്‍ രണ്ടുപേര്‍ക്ക് സാരമായി പരുക്കേറ്റു. ചാലപ്പുറത്തെ പറയംകണ്ടി സുഹൈല്‍ (20), നാദാപുരം താലൂക്ക് ആശുപത്രിക്കു സമീപത്തെ താഴേക്കണ്ടി റമീസ് (19) എന്നിവര്‍ക്കാണ് കുത്തേറ്റത്.
ഇവരെ വടകരയിലെ സ്വകാര്യ ആശുപത്രിയില്‍ പ്രവേശിപ്പിച്ചു. നാദാപുരം കണ്ണോളി ഭാഗത്തുനിന്ന് മരണാനന്തര ചടങ്ങുകള്‍ കഴിഞ്ഞു പോവുകയായിരുന്ന യുവാക്കള്‍ തമ്മിലാണ് ഏറ്റുമുട്ടലുണ്ടായത്.
സംഭവത്തില്‍ മറ്റൊരു യുവാവിനും പരുക്കേറ്റു.
സംഭവത്തെ തുടര്‍ന്ന് വളയത്തെ ഒറ്റപ്പിലാവുള്ളതില്‍ സിറാജിനെ നാദാപുരം പൊലിസ് പിടികൂടി. വഴിയില്‍ തടഞ്ഞു നിര്‍ത്തി ആക്രമിച്ചതായാണ് പരാതി.
നേരത്തെ ഇവര്‍ തമ്മില്‍ വാക്കേറ്റവും മറ്റുപ്രശ്‌നങ്ങളുമുള്ളതായി നാട്ടുകാര്‍ പറഞ്ഞു. ഇരുവരുടെയും പരാതിയില്‍ നാദാപുരം പൊലിസ് കേസെടുത്തു.