കൊണ്ടോട്ടി: ദുബൈയില്‍ നിന്നെത്തിയ രണ്ടു യാത്രക്കാരില്‍ നിന്ന് 37 ലക്ഷത്തിന്റെ സ്വര്‍ണവും കുങ്കുമപ്പൂവും കരിപ്പൂര്‍ എയര്‍ കസ്റ്റംസ് ഇന്റലിജന്‍സ് പിടികൂടി.
കോഴിക്കോട് കുന്നമംഗലം സ്വദേശി നൗഷാദ് (36), കാസര്‍കോട് സ്വദേശി റഫീഖ് (46) എന്നിവരില്‍ നിന്ന് സ്വര്‍ണവും കുങ്കുമപ്പൂവും പിടികൂടിയത്. ദുബൈയില്‍ നിന്ന് സ്‌പേസ് ജെറ്റ് വിമാനത്തിലാണ് നൗഷാദ് കരിപ്പൂരിലെത്തിയത്. ഇയാളുടെ ബാഗേജിലുണ്ടായിരുന്ന സൈക്കിള്‍ ട്യൂബിനകത്ത് 600 ഗ്രാം സ്വര്‍ണം ഒളിപ്പിച്ച നിലയിലായിരുന്നു.
18 ലക്ഷം രൂപ വില ലഭിക്കും. ദുബൈയില്‍ നിന്നുളള എയര്‍ഇന്ത്യ എക്‌സ്പ്രസ് വിമാനത്തിലാണ് റഫീഖ് കരിപ്പൂരിലെത്തിയത്. ഇയാളുടെ ബാഗേജ് പരിശോധനയിലാണ് 19 ലക്ഷത്തിന്റെ കുങ്കുമപ്പൂവാണ് കണ്ടെത്തിയത്. ഉത്തരേന്ത്യന്‍ മാര്‍ക്കറ്റ് ലക്ഷ്യമിട്ട് കടത്തിയ ഇറാനിയന്‍ കുങ്കുമപ്പൂവാണ് പിടികൂടിയത്.