ന്യൂഡല്‍ഹി: ജിഷ്ണു പ്രണോയ് കേസില്‍ സുപ്രിം കോടതി ഇന്ന് പരിഗണിക്കും. കേസില്‍ കഴിഞ്ഞ ദിവസമാണ് അന്വേഷണ പുരോഗതി റിപ്പോര്‍ട്ട് സര്‍ക്കാര്‍ സമര്‍പ്പിച്ചത്. റിപ്പോര്‍ട്ടില്‍ നെഹ്‌റു കോളജില്‍ നിന്ന് പിടിച്ചെടുത്ത ഹാര്‍ഡ് ഡിസ്‌കിന്റെ പരിശോധന ഫലത്തിനായി കാത്തിരിക്കുകയാണെന്നും പൊലിസ് അറിയിച്ചു. ജിഷ്ണുവിന്റേതെന്ന് ആരോപിക്കപ്പെടുന്ന മാപ്പ് അപേക്ഷകളിലെ കൈയ്യക്ഷരങ്ങള്‍ മുഴുവനായും ജിഷ്ണുവിന്റേതല്ലെന്നും പ്രണോയ് എന്ന് പേരെഴുതിയതില്‍ മാത്രമേ സാമ്യമുള്ളൂ എന്നും അന്വേഷണ പുരോഗതി റിപ്പോര്‍ട്ടില്‍ പറയുന്നു.

കേസില്‍ സി.ബി.ഐ അന്വേഷണം ആവശ്യപ്പെട്ട് മാതാവ് സുപ്രിം കോടതിയെ സമീപിച്ചിരുന്നു. സംസ്ഥാന സര്‍ക്കാര്‍ സി.ബി.ഐ അന്വേഷണത്തിനായി ഉത്തരവിട്ടിട്ടുണ്ടെങ്കിലും കേസ് ഇതുവരെ സി.ബി.ഐ ഏറ്റെടുത്തിട്ടില്ല.