സിയൂള്‍: കൊറിയന്‍ ഭൂഖണ്ഡത്തില്‍ യു.എസ് സൂപ്പര്‍ സോണിക് ബോംബറുകളുടെ പരിശീലനം നടത്തി. ജപ്പാന്‍, ദക്ഷിണ കൊറിയ എന്നീ രാഷ്ട്രങ്ങളുമായുള്ള സംയുക്ത പരിശീലനത്തിന്റെ ഭാഗമായാണ് ബോംബര്‍ വിമാനങ്ങള്‍ പറത്തിയതെന്ന് യു.എസ് വ്യോമ സേന പറഞ്ഞു. ദക്ഷിണ കൊറിയയില്‍ ഡൊണാള്‍ഡ് ട്രംപ് സന്ദര്‍ശനം നടത്താനിരിക്കെയാണ് യു.എസ് വ്യോമ സേനയുടെ വിമാനം പറത്തല്‍. നാളെ മുതല്‍ 14 വരെ നടത്തുന്ന ഏഷ്യന്‍ സന്ദര്‍ശനത്തിന്റെ ഭാഗമായാണ് ട്രംപ് ദക്ഷിണ കൊറിയ സന്ദര്‍ശിക്കുന്നത്.
പസഫിക് സമുദ്രത്തിലെ ഗുവാം ദ്വീപിലുള്ള ആന്‍ഡോഴ്‌സണ്‍ എയര്‍ ഫോഴ്‌സ് താവളത്തില്‍ നിന്ന് പറന്നുയര്‍ന്ന ബോംബര്‍ വിമാനങ്ങള്‍ കെറിയയുടെ തെക്കും ജപ്പാന്റെ പടിഞ്ഞാറുമായി പ്രകടനം നടത്തി. പിന്നീട് കൊറിയയുടെ വ്യോമാതിര്‍ത്തിയില്‍ മഞ്ഞക്കടല്‍ മേഖലയില്‍ ദക്ഷിണ കൊറിയന്‍ വിമാനങ്ങളുമായി തിരികെയെത്തിയെന്ന് യു.എസ് പസഫിക് എയര്‍ ഫോഴസിന്റെ വാര്‍ത്താകുറിപ്പില്‍ പറഞ്ഞു.
സൈനിക പരിശീലനത്തിന്റെ ഭാഗമായി മാത്രമാണ് വിമാനം പറത്തിയതെന്നും നിലവിലെ സാഹചര്യങ്ങളുമായി ഇതിന് ബന്ധമില്ലെന്നും അവര്‍ വ്യക്തമാക്കി. ജപ്പാന്‍, ദക്ഷിണ കൊറിയ, യു.എസ് സേനകളുടെ സംയുക്ത പരിശീലനം കഴിഞ്ഞ മാസം പത്തിനാണ് ആരംഭിച്ചത്.
എന്നാല്‍ ഉപഭൂഖണ്ഡത്തിനു സമീപം ബോംബര്‍ വിമാനങ്ങള്‍ പറത്തിയതിനെ ഉത്തരകൊറിയ വിമര്‍ശിച്ചു. ഗുണ്ടാ സംഘങ്ങളെപ്പോലെ പെരുമാറുന്ന യു.എസ് ആണവ ശക്തിയായ ഉത്തരകൊറിയയെ ഭീഷണപ്പെടുത്താന്‍ ശ്രമിക്കുകയാണെന്ന് ഉത്തരകൊറിയയുടെ ഔദ്യോഗിക വാര്‍ത്താ എജന്‍സിയായ കെ.സി.എന്‍.എ പറഞ്ഞു. ആണവ യുദ്ധമുണ്ടാക്കാനായാണ് യു.എസ് പ്രകോപനമുണ്ടാക്കുന്നത്. എന്നാല്‍ കൊറിയന്‍ സൈന്യവും ജനങ്ങളും ഇത്തരം നീക്കങ്ങളില്‍ ഭയപ്പെടില്ലെന്നും കെ.സി.എന്‍.എ പറഞ്ഞു.