മുംബൈ: ശിവസേനാ അധ്യക്ഷന്‍ ഉദ്ധവ് താക്കറെയും ബംഗാള്‍ മുഖ്യമന്ത്രി മമതാ ബാനര്‍ജിയും തമ്മില്‍ കൂടിക്കാഴ്ച നടത്തിയതിന് പിന്നാലെ മമതയെ വാനോളം പുകഴ്ത്തി ശിവസേനാ മുഖപത്രം. തൃണമൂലുമായി പുതിയ സഖ്യത്തിനുള്ള ശിവസേനയുടെ നീക്കമാണ് ഇതിനു പിന്നിലെന്നാണ് വിവരം.
ബംഗാളില്‍ ഇടതുപാര്‍ട്ടികളെ ഒറ്റയ്ക്കു നിന്ന് നേരിടുന്ന പുലിയാണ് മമതയെന്നാണ് പാര്‍ട്ടി മുഖപത്രമായ സാമ്‌നയുടെ എഡിറ്റോറിയല്‍ പ്രശംസിക്കുന്നത്. ഉദ്ധവ് താക്കറെയുമായി മമതയ്ക്കുള്ള സൗഹൃദവും എഡിറ്റോറിയലില്‍ പരാമര്‍ശിക്കുന്നുണ്ട്. ഇടതുപാര്‍ട്ടികളെ ഒറ്റയ്ക്ക് നേരിട്ടാണ് മമത ബംഗാള്‍ പിടിച്ചടക്കിയത്.
തെരഞ്ഞെടുപ്പുകള്‍ ജയിക്കാന്‍ അവര്‍ക്ക് വോട്ടിങ് മെഷീനില്‍ കൃത്രിമം കാണിക്കുകയോ വോട്ടിന് പണം നല്‍കുകയോ ചെയ്യേണ്ടിവന്നിട്ടില്ല.
കഴിഞ്ഞ ദിവസം മുംബൈയില്‍ മമതയും ഉദ്ധവ് താക്കറെയും ചര്‍ച്ച നടത്തിയിരുന്നു. ബി.ജെ.പി അധ്യക്ഷന്‍ അമിത് ഷായുടെ കടുത്ത വൈരിയായി വിശേഷിപ്പിക്കപ്പെടുന്ന മമതയും ബി.ജെ.പിയുമായി ഇടഞ്ഞുനില്‍ക്കുന്ന ശിവസേനാ തലവന്‍ ഉദ്ധവ് താക്കറേയും തമ്മിലുള്ള ഈ കൂടിക്കാഴ്ച രാഷ്ട്രീയ വൃത്തങ്ങളില്‍ വലിയ ചര്‍ച്ചയായിരുന്നു. ഇതിനുപിന്നാലെയാണ് സാമ്‌നയില്‍ മമതയെ പുകഴ്ത്തിക്കൊണ്ടുള്ള മുഖപ്രസംഗം വന്നത്.
നോട്ട് നിരോധനം, ജി.എസ്.ടി എന്നിവയുടെപേരില്‍ ബി.ജെ.പിയെ നിരന്തരം വിമര്‍ശിക്കുന്ന ഇരുപാര്‍ട്ടികളും 2019ലെ ലോക്‌സഭാ തെരഞ്ഞെടുപ്പില്‍ ബി.ജെ.പി വിരുദ്ധ മുന്നണി രൂപീകരിച്ചേക്കുമെന്നും റിപ്പോര്‍ട്ടുണ്ട്.