ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോള്‍ ടീം വെസ്റ്റ് ഹാം യുനൈറ്റഡ് പരിശീലകന്‍ സ്ലാവന്‍ ബിലിക്കിനെ പുറത്താക്കി.
കഴിഞ്ഞ ദിവസം സ്വന്തം മൈതാനത്ത് ലിവര്‍പൂളിനോട് 4-1ന് പരാജയപ്പെട്ടതിന് പിന്നാലെയാണ് ടീം പരിശീലകനെ പുറത്താക്കിയത്.
ബിലിക്കിന് പകരം മുന്‍ എവര്‍ട്ടന്‍, മാഞ്ചസ്റ്റര്‍ യുനൈറ്റഡ് പരിശീലകന്‍ ഡേവിഡ് മോയസിന് താത്കാലിക ചുമതല നല്‍കാന്‍ ക്ലബ് തീരുമാനിച്ചു. ഈ സീസണ്‍ അവസാനിക്കുന്നത് വരെ ആറ് മാസത്തെ കരാര്‍ നല്‍കിയാണ് മോയസിനെ കൊണ്ടുവരുന്നത്. ക്ലബിന്റെ പ്രകടനം മെച്ചപ്പെട്ടാല്‍ മോയസിന് പരിശീലകനായി തുടരാനുള്ള കാലാവധി നീട്ടിനല്‍കുമെന്ന് ക്ലബ് വ്യക്തമാക്കി.
2015ല്‍ സാം അല്ലാര്‍ഡൈസിന് പകരമാണ് ബിലിക്കിനെ വെസ്റ്റ് ഹാം കോച്ചായി നിയമിച്ചത്. കഴിഞ്ഞ സീസണില്‍ ടീമിനെ പ്രീമിയര്‍ ലീഗില്‍ ഏഴാം സ്ഥാനത്ത് വരെയെത്തിക്കാന്‍ അദ്ദേഹത്തിന് സാധിച്ചു. എന്നാല്‍ ഈ സീസണില്‍ ടീമിന്റെ പ്രകടനം മോശമായിരുന്നു. പതിനൊന്ന് മത്സരങ്ങള്‍ പൂര്‍ത്തിയായപ്പോള്‍ രണ്ട് വിജയം മാത്രമാണ് വെസ്റ്റ് ഹാമിന് സ്വന്തമാക്കാന്‍ സാധിച്ചത്.
പോയിന്റ് പട്ടികയില്‍ തരംതാഴ്ത്തല്‍ ഭീഷണിയിലാണ് ടീം ഇപ്പോള്‍ നില്‍ക്കുന്നത്. ബിലിക്കിനൊപ്പം അദ്ദേഹത്തിന്റെ കോച്ചിങ് സ്റ്റാഫ് അംഗങ്ങളും ക്ലബില്‍ നിന്ന് പിന്‍മാറിയിട്ടുണ്ട്.