അഹമ്മദാബാദ്: ഗുജറാത്തില്‍ വിവരാവകാശ പ്രവര്‍ത്തകന്‍ അമിത് ജേത്‌വ കൊല്ലപ്പെട്ട സംഭവത്തില്‍ മുന്‍ എം.പിയും ബി.ജെ.പി നേതാവുമായ ദിനു സോളങ്കി കീഴടങ്ങി.

സുപ്രിംകോടതി ജാമ്യം റദ്ദാക്കിയതോടെയാണ് സോളങ്കി പ്രത്യേക സി.ബി.ഐ കോടതി മുന്‍പാകെ ഇന്നലെ കീഴടങ്ങിയത്. ഇദ്ദേഹത്തെ സബര്‍മതി ജയിലിലടച്ചു.

സാക്ഷികളായ എട്ട് പേരുടെ വിസ്താരം കഴിയുന്നത് വരെ ജാമ്യം അനുവദിക്കാനാവില്ലെന്ന് കാണിച്ച് ഒക്ടോബര്‍ 30നാണ് കോടതി സോളങ്കിയുടെ ജാമ്യം റദ്ദാക്കിയത്.

2010 ജൂലൈയില്‍ ഗുജറാത്ത് ഹൈക്കോടതിക്ക് പുറത്തുവച്ചാണ് അമിത് ജേത്‌വ വെടിയേറ്റ് മരിച്ചത്. ഗിര്‍ വനത്തിലെ അനധികൃത ഖനനം പുറത്തുകൊണ്ടുവന്നതിന് പിന്നാലെയാണ് ജാത്‌വേ കൊല്ലപ്പെട്ടത്. 2013ല്‍ സി.ബി.ഐയാണ് സോളങ്കിയെ പ്രതിചേര്‍ത്തത്.