കൊച്ചി: കേരളത്തില്‍ നിര്‍ബന്ധിത മത പരിവര്‍ത്തനമുണ്ടെന്ന നിലപാട് ആവര്‍ത്തിച്ച് ദേശീയ വനിത കമ്മിഷന്‍ അധ്യക്ഷ രേഖ ശര്‍മ്മ. എം.സി ജോസഫൈന്റെ നിലപാട് രാഷ്ട്രീയപരമാണെന്നും നിര്‍ബന്ധമായും അല്ലാതെയും കേരളത്തില്‍ മതപരിവര്‍ത്തനം നടക്കുന്നുണ്ടെന്നും അവര്‍ പറഞ്ഞു.

ഇന്ത്യയില്‍ ഏറ്റവും കൂടുതല്‍ മതപരിവര്‍ത്തനം നടക്കുന്ന സംസ്ഥാനം കേരളമാണെന്നും മറ്റൊരു മതത്തോടുള്ള സ്‌നേഹം കൊണ്ടല്ല പല മതംമാറ്റങ്ങളും നടക്കുന്നതെന്നും രേഖ ശര്‍മ്മ പറഞ്ഞു. കഴിഞ്ഞ രണ്ടു ദിവസമായി ഇതു സംബന്ധിച്ച പരാതികള്‍ തനിക്കു ലഭിച്ചിട്ടുണ്ടെന്നും സംഭവം ഗൗരവപരമായി കാണുമെന്നും അവര്‍ പറഞ്ഞു.

കഴിഞ്ഞ ദിവസം ഹാദിയയെ സന്ദര്‍ശിച്ച വേളയിലാണ് കേരളത്തില്‍ ലൗജിഹാദല്ല നിര്‍ബന്ധിത മതപരിവര്‍ത്തനമാണ് നടക്കുന്നതെന്ന് ദേശീയ വനിത കമ്മിഷന്‍ അധ്യക്ഷ പറഞ്ഞത്.

എന്നാല്‍ സംസ്ഥാനത്ത് നിര്‍ബന്ധിത മതപരിവര്‍ത്തനമില്ലെന്നും ദേശീയ വനിത കമ്മിഷന്റേത് തെറ്റായ പ്രസ്താവനയാണെന്നും സംസ്ഥാന വനിതാ കമ്മിഷന്‍ അധ്യക്ഷ എം.സി ജോസഫൈന്‍ ഇന്ന് മാധ്യമങ്ങളോട് പറഞ്ഞിരുന്നു. കേരളത്തെ കുറിച്ച് മനസ്സിലാക്കാതെയാണ് അവര്‍ സംസാരിച്ചതെന്നും ഇത്തരം പ്രസ്താവനകള്‍ ദേശീയ തലത്തില്‍ കേരളത്തെ ഇകഴ്ത്താന്‍ വേണ്ടിയുള്ളതാണെന്നും എം സി ജോസഫൈന്‍ മാധ്യമങ്ങളോട് പറഞ്ഞു.