ന്യൂഡല്‍ഹി: പറമ്പികുളം- ആളിയാര്‍ നദീജല ഉടമ്പടി തുടര്‍ച്ചയായി ലംഘിച്ച തമിഴ്‌നാട് കേരളത്തിന് 106 കോടി രൂപ നഷ്ടപരിഹാരം നല്‍കേണ്ടതുണ്ടോയെന്നതു സംബന്ധിച്ച് പരിശോധിക്കുമെന്ന് സുപ്രിംകോടതി. കേസില്‍ തെളിവുകളും സാക്ഷികളെയും ഹാജരാക്കാന്‍ ഇരു സംസ്ഥാനങ്ങള്‍ക്കും കോടതി മൂന്നുമാസത്തെ സാവകാശവും അനുവദിച്ചു.
നദീജല ഉടമ്പടി പ്രകാരമുള്ള വെള്ളം 2012-13 വര്‍ഷം തമിഴ്‌നാട് അനുവദിക്കാത്തതിനെ ചോദ്യം ചെയ്ത് കേരളം നല്‍കിയ ഹരജിയാണ് ജസ്റ്റിസ് അരുണ്‍മിശ്ര അധ്യക്ഷനായ ബെഞ്ച് മുന്‍പാകെയുള്ളത്. കേസിലെ പരിഗണനാവിഷയങ്ങള്‍ രണ്ടംഗബെഞ്ച് തയാറാക്കി.
കരാര്‍ ലംഘനത്തിന് തമിഴ്‌നാടിന് 50 കോടി രൂപ പിഴ ചുമത്തേണ്ടതുണ്ടോ, വെള്ളം ലഭിക്കാത്തതിനാല്‍ കേരളത്തില്‍ 56 കോടി രൂപയുടെ നാശനഷ്ടമുണ്ടായോ, 1970 ലെ ഉടമ്പടി പ്രകാരം ഷോളയാറില്‍നിന്ന് 12.3 ഘനയടി വെള്ളവും ആളിയാറില്‍നിന്ന് 7.25 ഘനയടി വെള്ളവും ഓരോവര്‍ഷവും നല്‍കാന്‍ തമിഴ്‌നാടിന് ബാധ്യതയുണ്ടോ, വെള്ളത്തിന്റെ ഒഴുക്കില്‍ കുറവുണ്ടാകുന്ന വര്‍ഷങ്ങളിലും അത് സംസ്ഥാനങ്ങള്‍ തുല്യമായി പങ്കിടണമോ, വരള്‍ച്ചാ ബാധിത വര്‍ഷങ്ങളിലും മുന്‍ ഉടമ്പടി പ്രകാരമുള്ള വെള്ളം നല്‍കാന്‍ തമിഴ്‌നാടിന് ബാധ്യതയുണ്ടോ തുടങ്ങിയ പത്തുകാര്യങ്ങളാണ് പരിഗണിക്കുക. കേസില്‍ മാര്‍ച്ചില്‍ അന്തിമവാദം കേള്‍ക്കും.