കാബൂള്‍: അഫ്ഗാനിസ്ഥാനിലെ പ്രമുഖ ചാനലായ ഷംഷാദിന്റെ ഓഫിസിന് നേരെ ഭീകരാക്രമണം. തോക്കുധാരികള്‍ നടത്തിയ ആക്രമണത്തില്‍ രണ്ടുപേര്‍ കൊല്ലപ്പെടുകയും 20 പേര്‍ക്ക് പരുക്കേല്‍ക്കുകയും ചെയ്തു. പഷ്തു ഭാഷയിലുള്ള സ്വകാര്വ ചാനലാണിത്. ഓഫിസില്‍ പ്രവേശിച്ച ആക്രമികള്‍ സുരക്ഷാ ഉദ്യോഗസ്ഥനുനേരെ ഗ്രനേഡ് എറിഞ്ഞതിനുശേഷം ജീവനക്കാര്‍ക്കെതിരേ വെടിയുതിര്‍ക്കുകയായിരുന്നു. കെട്ടിടത്തിന്റെ ചില്ലുകള്‍ തകര്‍ത്താണ് പലരും രക്ഷപ്പെട്ടതെന്ന് ചാനലിന്റെ ന്യൂസ് ഡയരക്ടര്‍ ആബിദ് ഇഹ്‌സാസ് പറഞ്ഞു.
ആക്രമണത്തിന്റെ ഉത്തരവാദിത്വം ഐ.എസ് ഏറ്റെടുത്തു. അവരുടെ ഔദ്യോഗിക വാര്‍ത്താ ഏജന്‍സിയായ അമഖിലൂടെ പുറത്തുവിട്ട പ്രസ്താവനയിലാണ് ഇക്കാര്യം അറിയിച്ചത്.
അഫ്ഗാനിസ്ഥാനില്‍ മാധ്യമപ്രവര്‍ത്തകര്‍ക്കെതിരേ ഏറ്റവും കൂടുതല്‍ ആക്രമണം നടന്ന വര്‍ഷമാണിതെന്ന് മാധ്യമപ്രവര്‍ത്തകരുടെ സുരക്ഷാ കമ്മിറ്റി പുറത്തുവിട്ട റിപ്പോര്‍ട്ട് വ്യക്തമാക്കി.
13 മാധ്യമപ്രവര്‍ത്തകരാണ് ഈ വര്‍ഷം കൊല്ലപ്പെട്ടത്. സിറിയക്ക് ശേഷം മാധ്യമപ്രവര്‍ത്തകര്‍ക്കെതിരേ ഏറ്റവും കൂടുതല്‍ ആക്രമണം നടക്കുന്ന രാജ്യമാണ് അഫ്ഗാനിസ്ഥാന്‍.