ന്യൂഡല്‍ഹി: ബി.ജെ.പിയെ പ്രതിക്കൂട്ടിലാക്കുന്ന പരാമര്‍ശവുമായി മുതിര്‍ന്ന നേതാവ് യശ്വന്ത് സിന്‍ഹ വീണ്ടും. പാരഡൈസ് പേപ്പറില്‍ മകനും കേന്ദ്ര മന്ത്രിയുമായ ജയന്ത് സിന്‍ഹയ്‌ക്കെതിരായ പരാമര്‍ശം വന്ന സാഹചര്യത്തിലാണ് കേന്ദ്ര സര്‍ക്കാരിനും ബി.ജെ.പിക്കും പ്രതിസന്ധി സൃഷ്ടിക്കുന്ന തരത്തില്‍ അദ്ദേഹം വീണ്ടും പ്രതികരണവുമായി രംഗത്തെത്തിയത്.
വിദേശത്ത് അനധികൃത നിക്ഷേപം നടത്തിയെന്ന് പാരഡൈസ് പേപ്പറില്‍ പരാമര്‍ശിക്കുന്ന ജയന്ത് സിന്‍ഹയടക്കം 714 പേരെക്കുറിച്ച് അന്വേഷിക്കാന്‍ കേന്ദ്ര ധനമന്ത്രി ഉത്തരവിട്ട സാഹചര്യത്തിലാണ് യശ്വന്ത് സിന്‍ഹ വിമര്‍ശനവുമായി മുന്നോട്ടുവന്നത്. അന്വേഷണം നടത്തുകയാണെങ്കില്‍ കേന്ദ്രത്തില്‍ ബി.ജെ.പി അധികാരത്തില്‍ വന്ന 2014 മുതല്‍ അമിത്ഷായുടെ മകന്‍ ജെയ്ഷായുടെ ഉടമസ്ഥതയിലുള്ള സ്ഥാപനം വന്‍തോതില്‍ ലാഭമുണ്ടാക്കിയെന്നത് എങ്ങനെയാണെന്ന് അന്വേഷിക്കണമെന്ന് അദ്ദേഹം ആവശ്യപ്പെട്ടു.