കാഞ്ഞങ്ങാട്: ജില്ലാ ആശുപത്രിയിലെ പുതിയ ഓട്ടോ ക്ലേവ് ഉപകരണം കേടായതിനെ തുടര്‍ന്ന് പഴയ ഉപകരണം താല്‍ക്കാലികമായി നന്നാക്കി. കേരള മെഡിക്കല്‍ സര്‍വിസ് കോര്‍പറേഷന്‍ നേതൃത്വത്തില്‍ സ്ഥാപിച്ച ഓട്ടോക്ലേവാണ് കേടായത്. ഉപകരണം കേടായതിനെ തുടര്‍ന്നു മുടങ്ങിയ വലിയ ശസ്ത്രക്രിയകള്‍ വീണ്ടും തുടങ്ങി. ഗുണനിലവാരമില്ലാത്തതാണു തകരാറിലാവാന്‍ കാരണമെന്ന ആക്ഷേപവും ഉയര്‍ന്നിരുന്നു.
ശസ്ത്രക്രിയാ ഉപകരണങ്ങള്‍ അണുവിമുക്തമാക്കുമ്പോള്‍ യന്ത്രത്തിന്റെ താപനില ഉയരുന്നതിനാല്‍ ഉപകരണത്തിനകത്തെ കോട്ടിങുകള്‍ ഉരുകിയൊലിക്കുക പതിവായിരുന്നു. ഇതേ തുടര്‍ന്നാണു യന്ത്രം തകരാറിലായത്. ഗ്യാരണ്ടി ഉള്ളതിനാല്‍ മാറ്റി നല്‍കണമെന്നു ചുമതലയുള്ള ജില്ലാ പഞ്ചായത്ത് അധികൃതര്‍ ആവശ്യപ്പെട്ടിട്ടുണ്ട്. എന്നാല്‍ യന്ത്രം ഇതുവരെയായും കൊണ്ടു പോയിട്ടില്ല.
ശസ്ത്രക്രിയകള്‍ പതിവായി മുടങ്ങിയതോടെയാണ് ഇവിടെ ഉണ്ടായിരുന്ന പഴയ യന്ത്രം നന്നാക്കിയെടുത്തത്. ഇതും ഏറെക്കാലം നിലനില്‍ക്കുവാന്‍ സാധ്യത കുറവായതിനാല്‍ ഏതു നിമിഷവും ശസ്ത്രക്രിയകള്‍ മുടങ്ങാനിടയുണ്ട്. ഇതൊഴിവാക്കാന്‍ പുതിയ യന്ത്രം എത്രയും പെട്ടെന്നു മാറ്റി കൊണ്ടു വരണമെന്നാണു രോഗികള്‍ ആവശ്യപ്പെടുന്നത്.