കൂത്തുപറമ്പ്: തൊക്കിലങ്ങാടിയില്‍ സ്വകാര്യ വ്യക്തിയുടെ പറമ്പ് വൃത്തിയാക്കുന്നതിനിടെ ആയുധങ്ങളും സ്റ്റീല്‍ ബോംബും പിടികൂടി. കൂത്തുപറമ്പ് ഹയര്‍ സെക്കന്‍ഡറി സ്‌കൂള്‍ ഗ്രൗണ്ടിനോട് ചേര്‍ന്നുള്ള സ്വകാര്യ വ്യക്തിയുടെ സ്ഥലത്ത് നിന്നാണ് ശൂലമുനയോടു കൂടിയ ഇരുമ്പുദണ്ഡ്, ഒരു വടിവാള്‍, ഒരു കൊടുവാള്‍, ഒരു സ്റ്റീല്‍ ബോംബ് എന്നിവയും ഒഴിഞ്ഞ ഒരു സ്റ്റീല്‍ കണ്ടെയ്‌നറും കണ്ടെടുത്തത്. ഇന്നലെ രാവിലെ തൊഴിലാളികള്‍ മെഷീന്‍ ഉപയോഗിച്ച് കാട് വെട്ടി തെളിക്കുന്നതിനിടെയാണ് പ്ലാസ്റ്റിക് സഞ്ചിയില്‍ പൊതിഞ്ഞ നിലയില്‍ ആയുധങ്ങളും കുറച്ചകലെയായി സ്റ്റീല്‍ ബോംബും കണ്ടെത്തിയത്. കൂത്തുപറമ്പ് പൊലിസ് സ്ഥലത്തെത്തി ഇവ കസ്റ്റഡിയിലെടുത്തു. കഴിഞ്ഞ ദിവസം സമീപത്തായുള്ള ആര്‍.എസ്.എസ് കാര്യാലയത്തിനു നേരെ ബോംബേറുണ്ടായ സംഭവത്തെ തുടര്‍ന്ന് പൊലിസ് നടത്തിയ തെരച്ചിലില്‍ കാര്യാലയത്തിന്റെ ടെറസില്‍ നിന്നു രണ്ട് നാടന്‍ ബോംബുകള്‍ കണ്ടെത്തിയിരുന്നു.