ന്യൂഡല്‍ഹി: അന്തരീക്ഷ മലിനീകരണം രൂക്ഷമായി പുകമൂടിയ ഡല്‍ഹിയില്‍ സംസ്ഥാന സര്‍ക്കാര്‍ സമര്‍പ്പിച്ച പദ്ധതിക്കു ദേശീയ ഹരിത ട്രൈബ്യൂണലിന്റെ അംഗീകാരം. എന്നാല്‍, സര്‍ക്കാര്‍ സമര്‍പ്പിച്ച പദ്ധതിയില്‍ ചില മാറ്റങ്ങള്‍ വരുത്തിയാണ് ട്രൈബ്യൂണലിന്റെ അംഗീകാരം. ഇതു സര്‍ക്കാര്‍ അംഗീകരിച്ചിട്ടില്ല.
സ്വകാര്യ വാഹനങ്ങള്‍ നിരത്തിലിറക്കുന്നതിന് ഒറ്റ-ഇരട്ടയക്ക സമ്പ്രദായം നടപ്പാക്കാനാണ് ഡല്‍ഹി സര്‍ക്കാര്‍ അനുമതി തേടിയിരുന്നത്. ഈ മാസം 13 മുതല്‍ 17വരെ നിയന്ത്രണം നടപ്പില്‍വരുത്താനായിരുന്നു പദ്ധതി.
രാവിലെ എട്ടുമുതല്‍ വൈകിട്ട് അഞ്ചുവരെയാണ് ഇതു ബാധകമാകുക. വാഹന നമ്പറില്‍ ഒറ്റ-ഇരട്ടയക്കങ്ങള്‍ അവസാനം വരുന്ന വാഹനങ്ങള്‍ നിരത്തിലിറക്കുന്നതിന് ഒന്നിടവിട്ട ദിവസങ്ങളില്‍ നിയന്ത്രണം എന്നതാണ് ഈ പദ്ധതി.
എന്നാല്‍ ഇതില്‍നിന്ന് ആംബുലന്‍സ്, അഗ്നിശമനസേന, സി.എന്‍.ജി ഉപയോഗിച്ച് ഓടുന്ന വാഹനങ്ങള്‍, സര്‍ക്കാര്‍ ഉദ്യോഗസ്ഥര്‍, സ്ത്രീകള്‍, ഇരുചക്ര വാഹനങ്ങള്‍ എന്നിവര്‍ക്കു സര്‍ക്കാര്‍ ഇളവു നല്‍കിയിരുന്നു. ഇതില്‍ സര്‍ക്കാര്‍ ഉദ്യോഗസ്ഥര്‍, സ്ത്രീകള്‍, ഇരുചക്ര വാഹനങ്ങള്‍ എന്നിവയ്ക്കുള്ള ഇളവ് ഹരിത ട്രൈബ്യൂണല്‍ റദ്ദാക്കുകയായിരുന്നു. ഇതിനെതിരേ സര്‍ക്കാര്‍ വീണ്ടും ട്രൈബ്യൂണലിനെ സമീപിക്കുമെന്നാണ് വിവരം.