അഹമ്മദാബാദ്: ഗുജറാത്തില്‍ തെരഞ്ഞെടുപ്പ് പ്രചാരണം നടത്തുന്ന കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിക്കെതിരേ രൂക്ഷ വിമര്‍ശനവുമായി കേന്ദ്ര മന്ത്രി സ്മൃതി ഇറാനി. ഗുജറാത്ത് നിയമസഭാ തെരഞ്ഞെടുപ്പില്‍ കോണ്‍ഗ്രസ് വിജയിക്കുമെന്നു രാഹുല്‍ ഗാന്ധി സ്വപ്നം കാണേണ്ടതില്ലെന്ന് അവര്‍ പറഞ്ഞു.
രാഹുലിന്റെ ആ സ്വപ്നം സാക്ഷാല്‍ക്കരിക്കാന്‍ ബി.ജെ.പി സമ്മതിക്കില്ല. സ്വന്തം മണ്ഡലം നോക്കാന്‍ കഴിയാത്ത രാഹുലാണ് ഗുജറാത്തിന്റെ വികസനത്തെക്കുറിച്ചു സംസാരിക്കുന്നത്. ജി.എസ്.ടിയെ ഇപ്പോള്‍ എതിര്‍ക്കുന്ന കോണ്‍ഗ്രസ് ജി.എസ്.ടി കൗണ്‍സില്‍ യോഗങ്ങളില്‍ എതിര്‍ത്തിരുന്നില്ലെന്നു പറഞ്ഞ മന്ത്രി, അന്നു കോണ്‍ഗ്രസ് ഉള്‍പ്പെട്ട ജി.എസ്.ടി കൗണ്‍സില്‍ യോഗം അഭിപ്രായ ഐക്യത്തിലൂടെയാണ് ജി.എസ്.ടി കൊണ്ടുവന്നതെന്നും പറഞ്ഞു.
നേരത്തേ രാഹുല്‍ഗാന്ധിയെ പരിഹസിച്ചു രംഗത്തെത്തിയിരുന്ന ബി.ജെ.പി നേതാക്കള്‍ ഇപ്പോള്‍ അദ്ദേഹത്തെ ഗൗരവമായി എതിര്‍ക്കുകയാണ് ചെയ്യുന്നത്. ഗുജറാത്തില്‍ രാഹുല്‍ നടത്തുന്ന തെരഞ്ഞെടുപ്പ് പ്രചാരണം ബി.ജെ.പിക്കു വലിയ വെല്ലുവിളികള്‍ ഉയര്‍ത്തുന്നതിനിടെയാണ് സ്മൃതി ഇറാനിയുടെ പ്രസ്താവന.