നാദാപുരം: കുമ്മങ്കോട്ട് വീടുകള്‍ക്കു നേരെ നടന്ന ആക്രമണത്തില്‍ ഏഴു വീടുകള്‍ക്കു നാശനഷ്ടങ്ങള്‍ സംഭവിച്ചു. ആക്രമണത്തില്‍ വിവിധ വാഹനങ്ങളും നശിച്ചിട്ടുണ്ട്.
കളമുള്ളതില്‍ മാതയുടെ വീടിനു തീവച്ചതിനെ തുടര്‍ന്ന് സ്റ്റീല്‍ അലമാര, കട്ടില്‍, ജനലുകള്‍ എന്നിവ കത്തിനശിച്ചു. സംഭവത്തില്‍ പരുക്കേറ്റ മാതയെ ആശുപത്രിയില്‍ പ്രവേശിപ്പിച്ചു. വീട്ടുമുറ്റത്തു നിര്‍ത്തിയിട്ടിരുന്ന മകന്‍ മനോജിന്റെ ബൈക്കും ആക്രമികള്‍ തീവച്ചു നശിപ്പിച്ചു. തൊട്ടടുത്ത വീട്ടിലെ കാലമുള്ളതില്‍ ദാമുവിന്റെ വീടിനുനേരെയും മകന്‍ വിനോദിന്റെ വീടിനു നേരെയും ആക്രമണം നടന്നു. രണ്ടു വീടുകളുടെയും ജനല്‍ചില്ലുകള്‍ അടിച്ചുതകര്‍ത്ത അക്രമികള്‍ വീട്ടുമുറ്റത്തു നിര്‍ത്തിയിട്ടിരുന്ന മാരുതി കാറിന്റെ ചില്ലും നശിപ്പിച്ചു.
സംഘം പാതയോരത്തു നിര്‍ത്തിയിട്ടിരുന്ന നിലത്തു വിനോദിന്റെ പിക്കപ്പ് വാനിനും കേടുവരുത്തി. വാനിന്റെ ചില്ലുകള്‍ അടിച്ചുതകര്‍ത്ത നിലയിലാണുള്ളത്. വലിയപറമ്പത്ത് കണ്ണന്റെ വീടിനു നേരെയും ആക്രമണമുണ്ടായി. വീടിന്റെ മുന്‍വശത്തെ ചില്ലുകള്‍ തകര്‍ന്നു. തൊട്ടടുത്ത പറമ്പത്തു ജാനുവിന്റെ വീടിനു നേരെയും നടന്ന കല്ലേറില്‍ മുന്‍വശത്തെ ജനല്‍ചില്ലുകള്‍ തകര്‍ന്നു. കുറച്ചകലെ പുത്തന്‍പുരയില്‍ മാണിയുടെ വീടിനു നേരെയും ആക്രമണം നടന്നു. സംഭവത്തില്‍ പരുക്കേറ്റ മാണി, അയല്‍വാസികളായ ശ്രീനന്ദ, കൃഷ്ണന്‍, മകന്‍ ബൈജു എന്നിവരെ താലൂക്ക് ആശുപത്രിയില്‍ പ്രവേശിപ്പിച്ചു. ഇവിടെയുള്ള വീട്ടുപകരണങ്ങളെല്ലാം പുറത്തേക്കു വാരിവലിച്ചിട്ട നിലയിലാണ്. ജനല്‍ചില്ലുകളും തകര്‍ത്തിട്ടുണ്ട്. ബഹളംകേട്ട് അയല്‍വീട്ടിലെ കല്യാണവീട്ടില്‍ നിന്ന് ഓടിയെത്തി അക്രമികളെ തടഞ്ഞ തയ്യില്‍ അന്ത്രു, ബഷീര്‍, മഠത്തില്‍ പോക്കര്‍, കെ.വി അസീസ് എന്നിവര്‍ക്കു നേരെയും സംഘം കൈയേറ്റശ്രമം നടത്തി. കുമ്മങ്കോട്ട് ഹെല്‍ത്ത് സെന്ററിനു സമീപം കോട്ടാല ശ്രീധരന്റെ വീടിനു നേരെയും ആക്രമണം നടന്നു. വീടിന്റെ ജനല്‍ചില്ലുകള്‍ അക്രമികള്‍ എറിഞ്ഞുതകര്‍ത്തു.
പുറത്തുനിന്നെത്തിയ സംഘമാണ് ആക്രമണം നടത്തിയതെന്നു നാട്ടുകാര്‍ ആരോപിച്ചു.