പനമരം: കുണ്ടാലയില്‍ എസ്.ഡി.പി.ഐ-യൂത്ത് ലീഗ് പ്രവര്‍ത്തകര്‍ തമ്മിലുണ്ടായ സംഘര്‍ഷത്തില്‍ മൂന്ന് യൂത്ത് ലീഗ് പ്രവര്‍ത്തകര്‍ക്ക് പരുക്കേറ്റു. എസ്.ഡി.പി.ഐക്കെതിരേ വാട്‌സ്ആപ് സന്ദേശമയച്ചു എന്നാരോപിച്ചാണ് ലീഗ് പ്രവര്‍ത്തകര്‍ക്ക് നേരെ എസ്.ഡി.പി.ഐ സംഘം അക്രമണം നടത്തിയത്.
അക്രമത്തില്‍ യൂത്ത് ലീഗ് പ്രവര്‍ത്തകരായ അസീസ് പൊന്നന്‍(38), നിസാര്‍ പെരിങ്ങോടന്‍(30), അബ്ദുല്ല കാഞ്ഞിരങ്ങാടന്‍ എന്നിവര്‍ക്ക് പരുക്കേറ്റു. കൈക്കും മുഖത്തും പരുക്കേറ്റ ഇവര്‍ പനമരം ഗവ. ആശുപത്രിയില്‍ ചികിത്സയിലാണ്.
കുണ്ടാല മഹല്ല് കമ്മിറ്റിക്കെതിരേ എസ്.ഡി.പി.ഐ പ്രദേശത്ത് ഫ്‌ളക്‌സ് ബോര്‍ഡ് സ്ഥാപിച്ചിരുന്നു. വിഷയത്തില്‍ എസ്.ഡി.പി.ഐയെ വിമര്‍ശിച്ച് യൂത്ത് ലീഗ് പ്രവര്‍ത്തകര്‍ വാട്‌സ് അപ് സന്ദേശം അയച്ചു എന്നാരോപിച്ചാണ് എസ്.ഡി.പി.ഐ പ്രവര്‍ത്തകര്‍ അക്രമം അഴിച്ചുവിട്ടത്.
യാതൊരു പ്രകോപനവുമില്ലാതെയാണ് എസ്.ഡി.പി.ഐ പ്രവര്‍ത്തകര്‍ ആക്രമണം അഴിച്ചു വിട്ടതെന്ന് സംഘര്‍ഷത്തില്‍ പരുക്കേറ്റവര്‍ ആരോപിച്ചു. സംഭവത്തില്‍ പനമരം പൊലിസ് കേസെടുത്ത് അന്വേഷണം ആരംഭിച്ചു.