വടക്കാഞ്ചേരി: വൈദ്യുതി ബന്ധം നിലച്ചതിനെ തുടര്‍ന്ന് ജനറേറ്റര്‍ പ്രവര്‍ത്തിപ്പിയ്ക്കാന്‍ ജീവനക്കാര്‍ നടത്തിയ ശ്രമം വടക്കാഞ്ചേരി ജില്ലാ ആശുപത്രിയില്‍ വന്‍ പരിഭ്രാന്തിയും ഭയാശങ്കയും സൃഷ്ടിച്ചു. പെട്രോളില്‍ പ്രവര്‍ത്തിയ്ക്കുന്ന ജനറേറ്ററില്‍ ഡീസല്‍ ഒഴിച്ചതാണ് പ്രശ്‌നം സൃഷ്ടിച്ചത്. ജനറേറ്റര്‍ പ്രവര്‍ത്തനം ആരംഭിച്ചതോടെ ആശുപത്രിയില്‍ വലിയ തോതില്‍ പുക ഉയര്‍ന്നു നിരവധി രോഗികള്‍ ഡോക്ടര്‍മാരെ കാണാന്‍ തിങ്ങി കൂടി നില്‍ക്കുമ്പോഴാണ് ഒ.പി വിഭാഗം പുകയില്‍ നിറഞ്ഞത്.
ഇതോടൊപ്പം ഇരുട്ട് കൂടിയായതോടെ പലര്‍ക്കും ദേഹാസ്വാസ്ഥ്യം അനുഭവപ്പെട്ടു. അഗ്‌നിബാധയാണെന്ന തെറ്റായ പ്രചരണം കൂടി ഉണ്ടായതോടെ ഭീതി വര്‍ധിയ്ക്കുകയും ജനം ഭയചകിതരായി ഓടുകയും ചെയ്തു. വയോധികരില്‍ ചിലര്‍ മറിഞ്ഞ് വീണു. ഇത് സ്ഥിതി കൂടുതല്‍ വഷളാക്കി. സ്ഥലത്ത് പാഞ്ഞെത്തിയ സുരക്ഷാ ജീവനക്കാരും ഡോക്ടര്‍മാരുമൊക്കെ കാര്യങ്ങള്‍ പറഞ്ഞ് മനസിലാക്കിയതോടെയാണ് ഭയാശങ്കയും ഒഴിഞ്ഞത്.