തൃശൂര്‍: ഇന്ത്യന്‍ കോഫി ഹൗസില്‍ കണ്ണൂരിലുള്ളതിലും കൂടുതല്‍ വിലയാണ് തൃശൂര്‍ സംഘത്തിലെ കോഫി ഹൗസുകളില്‍ ഈടാക്കുന്നതെന്ന് സഹകരണ ജനാധിപത്യ സംരക്ഷണ മുന്നണി ചെയര്‍മാന്‍ കെ.രാജന്‍ എം.എല്‍.എ വാര്‍ത്താസമ്മേളനത്തില്‍ പറഞ്ഞു.
കണ്ണൂരില്‍ ഭക്ഷണ സാധനങ്ങള്‍ക്ക് കുറവ് വില വാങ്ങിയിട്ടും കൂടുതല്‍ ലാഭമുണ്ടാക്കുമ്പോള്‍ തൃശൂര്‍ സംഘത്തില്‍ കൂടുതല്‍ വില നല്‍കിയിട്ടും ഒട്ടുമിക്ക കോഫി ഹൗസുകളും നഷ്ടത്തിലാണെന്നാണ് കണക്കുകള്‍. കണ്ണൂര്‍ സംഘത്തില്‍ 22 കോഫീ ഹൗസുകള്‍ ഉള്ളതില്‍ 20 എണ്ണവും ലാഭത്തില്‍ പ്രവര്‍ത്തിക്കുമ്പോള്‍ തൃശൂര്‍ സംഘത്തിനു കീഴിലുള്ള 54 കോഫീ ഹൗസുകളില്‍ 38 എണ്ണവും നഷ്ടത്തിലാണെന്ന് എം.എല്‍.എ പറഞ്ഞു.
കണ്ണൂര്‍ സംഘത്തിന് കീഴിലുള്ള കോഫി ഹൗസുകളില്‍ മസാലദോശയ്ക്ക് 35ഉം ഊണിന് 40ഉം ചായയ്ക്ക് ഏഴ്, കാപ്പിക്ക് എട്ട് എന്നിങ്ങനെയാണ് വിലനിലവാരം. എന്നാല്‍ തൃശൂര്‍ സംഘത്തിന് കീഴിലുള്ള കോഫി ഹൗസുകളില്‍ മസാലദോശ 44, ഊണ് 55, ചായ ഒമ്പത്, കാപ്പി പത്ത് എന്നിങ്ങനെയാണ് വാങ്ങിക്കുന്നത്. കണ്ണൂര്‍ സംഘം 2015 16 വര്‍ഷത്തില്‍ മൊത്തം 53 കോടി രൂപ വരവും മൂന്നു കോടി ലാഭവുമുണ്ടാക്കി.
തൃശൂര്‍ സംഘം ഇതേ കാലയളവില്‍ മൊത്തം 121 കോടി വിറ്റു വരവും 34 ലക്ഷം രൂപ മാത്രമാണ് ലാഭമായി നേടിയത്. ഇന്താ കോഫീ ബോര്‍ഡ് തൊഴിലാളി സഹകരണ സംഘം ബോര്‍ഡിന്റെ കാലാവധി അഞ്ചു വര്‍ഷമാണെന്ന വാദം ശരിയല്ലെന്നും ഇതു സംബന്ധിച്ച് ജനറല്‍ ബോഡി തീരുമാനിക്കണമെന്നും ഭാരവാഹികള്‍ പറഞ്ഞു. കോഫി ഹൗസിന്റെ ഇത്തരം പ്രവര്‍ത്തനങ്ങള്‍ മൂലം സഹകരണ ജനാധിപത്യ സംരക്ഷണ മുന്നണി ഇത്തവണ തെരഞ്ഞെടുപ്പില്‍ സ്ഥാനാര്‍ഥികളെ നിര്‍ത്തി മത്സരിപ്പിക്കാന്‍ തീരുമാനിച്ചിരിക്കയാണെന്ന് ജനറല്‍ കണ്‍വീനര്‍ കെ.എഫ് ഡേവിസ് പറഞ്ഞു.
ഈ മാസം 19നാണ് തെരഞ്ഞെടുപ്പ്. സഹകരണ മുന്നണിയുടെ കെ.എന്‍ ലളിത എതിരില്ലാതെ തെരഞ്ഞെടുക്കപ്പെട്ടു. ട്രഷറര്‍ സി.കെ രാജേഷ്, ടി.പി പ്രവീണ്‍ വാര്‍ത്താസമ്മേളനത്തില്‍ പങ്കെടുത്തു.