ബെയ്ജിങ്: ചൈനയില്‍ ഹൗസിങ് കോളനിയിലുണ്ടായ തീപിടിത്തത്തില്‍ 19 പേര്‍ മരിച്ചു. തലസ്ഥാനമായ ബെയ്ജിങ്ങിന്റെ തെക്കന്‍ ഭാഗത്താണ് അപകടമുണ്ടായത്. നിരവധി പേര്‍ക്കു പരുക്കേല്‍ക്കുകയും ചെയ്തിട്ടുണ്ട്.
ബെയ്ജിങ്ങിനടുത്തെ ഡാക്‌സിങ് ജില്ലയില്‍ കുടിയേറ്റ തൊഴിലാളികള്‍ കൂടുതലായി താമസിക്കുന്ന കേന്ദ്രത്തില്‍ കഴിഞ്ഞ ദിവസം രാത്രിയാണ് തീപിടിത്തമുണ്ടായത്. രാത്രി മുഴുവനുമെടുത്താണ് തീ നിയന്ത്രണവിധേയമാക്കിയത്. അപകടകാരണം വ്യക്തമല്ല. എന്നാല്‍, സംഭവത്തിനു പിന്നില്‍ പ്രവര്‍ത്തിച്ചതായി സംശയിക്കുന്നവരെ അറസ്റ്റ് ചെയ്തതായി ബെയ്ജിങ് പൊലിസ് പറഞ്ഞു.
ചെറുകിട വസ്ത്ര നിര്‍മാണ യൂനിറ്റുകളും മേഖലയില്‍ പ്രവര്‍ത്തിക്കുന്നുണ്ട്. 14 അഗ്നിരക്ഷാ സംഘങ്ങള്‍ 30 ഫയര്‍ എന്‍ജിനുകളിലായി മണിക്കൂറുകളെടുത്താണ് തീ നിയന്ത്രണവിധേയമാക്കിയത്.