ന്യൂഡല്‍ഹി: നഗരത്തില്‍ അനധികൃതമായി സ്ഥലം കൈയേറി നിര്‍മിച്ച കൂറ്റന്‍ ഹനുമാന്‍ പ്രതിമ മാറ്റി സ്ഥാപിക്കണമെന്ന് ഡല്‍ഹി ഹൈകോടതി. ആക്റ്റിങ് ചീഫ് ജസ്റ്റിസ് ഗീത മിത്തല്‍, ജസ്റ്റിസ് സി ഹരി ശങ്കര്‍ എന്നിവരടങ്ങിയ ബെഞ്ചിന്റേതാണ് നിര്‍ദേശം. കരോള്‍ ഭാഗ് ഏരിയയില്‍ 108 അടി ഉയരത്തില്‍ സ്ഥാപിച്ചിരിക്കുന്ന പ്രതിമ പൊളിച്ചുനീക്കാതെ മാറ്റി സ്ഥാപിക്കണമെന്നാണ് കോടതി ഉത്തരവ്.


ഹനുമാന്‍ പ്രതിമ നിര്‍മിച്ചിരിക്കുന്നത് കൈയേറിയ സ്ഥലത്താണെന്ന് കാണിച്ച് നല്‍കിയ പൊതുതാല്‍പര്യ ഹരജി പരിഗണിക്കുകയായിരുന്നു കോടതി.

നഗരത്തില്‍ തിരക്കേറിയ പ്രദേശത്താണ് പ്രതിമ ഉയര്‍ത്തിയിട്ടുള്ളത്. അത് പൊളിക്കാതെ മാറ്റി സ്ഥാപിക്കാനുള്ള നടപടികള്‍ പരിഗണിക്കണമെന്ന് ലഫ്റ്റനന്റ് ഗവര്‍ണറോട് കോടതി ആവശ്യപ്പെട്ടു. വിദേശരാജ്യങ്ങളിലെല്ലാം അംബരചുംബികളായ കെട്ടിടങ്ങള്‍ വരെ മാറ്റി സ്ഥാപിക്കാറുണ്ടെന്നും കോടതി ചൂണ്ടിക്കാട്ടി.

ജനങ്ങളുടെ വികാരം പരിഗണിച്ച് നിയമാനുസൃതമായ മറ്റൊരു ഇടത്തേക്ക് പ്രതിമ മാറ്റി സ്ഥാപിക്കണമെന്നും കോടതി മുനിസിപ്പല്‍ കോര്‍പറേഷനോട് ആവശ്യപ്പെട്ടു. നിയമം നടപ്പിലാക്കാന്‍ പ്രാദേശിക ഭരണകൂടങ്ങള്‍ക്ക് അവസരങ്ങളുണ്ടായിട്ടും ആരും അത് ചെയ്യുന്നില്ലെന്ന്  കോടതി കുറ്റപ്പെടുത്തി.